Аймақ ахуалы қандай?
"Қазақстан теміржолшысы" газетінің Жамбыл облысындағы меншікті тілшісі
Теміржол бөлімшелерінің жұмыс нәтижесі жалпы 16 пайдалану көрсеткіші бойынша бағаланады. Оның негізгісі әрине, жүк айналымы. Әрі қарайғы жоспарлы талаптар осы жүк тасымалына қатысты туындайды.
Нақтырақ айтсақ, олар вагон және локомотив өндірісі, вагондардың жүрісі, салмағы, жүк көлемінің динамикасы мен статистикасы секілді бір-біріне тығыз байланысты міндетті жұмыстар.
«ҚТЖ-Жүк тасымалы» ЖШС – Жамбыл бөлімшесі филиалы бастығының бірінші орынбасары Мақсатбек Қазақбаев аймақтағы ахуал, пайдалану көрсеткішінің орындалу барысына шолу жасады.
– Техникалық жоспар бойынша 16 көрсеткіштің 11-і, директорлар кеңесі қойған 16 талаптың 13-і орындалмай келді. Бірақ қазан-қараша айларында жоспарды асыра орындап, көрсеткіштер бойынша айырмашылықтар арасын біршама қысқарттық. Алғашқысын 5-ке дейін, кейінгісін 2-ге дейін төмендеттік. Барлық талаптарды жүзеге асыру бағытында жұмысты зерделеп, жыл соңына дейін межеге жетуді көздеп отырмыз, – дейді Мақсатбек Айтмұрзаұлы.
Биылғы жылдың 9 айында Жамбыл жол бөлімшесінде бірқатар талаптар бойынша көрсеткіштердің төмендеуі – Жамбыл өңірінің Индустриялық аймағындағы өндіріс орындарында жүк тасымалының азайып кетуімен байланысты. «Қазфосфат», «ЕуроХим – Қаратау» және «Жамбыл цемент өндіру компаниясы» ЖШС-де есепті кезеңде жүк айналымы өскенмен, «Тараз қант зауыты», «Шығыс кен басқармасы», «Балқаш түсті металл» ЖШС-ларында керісінше күрт кеміген.
Жүк айналымының көрсеткішін көтеріп тұрған «Қазфосфатта» жүк тиеген вагон саны 480-ге артып, тасымалданған жүк көлемі 30 952 тоннаға өскен. Ал «ЕуроХим – Қаратау» серіктестігінде былтырғы 10 айдағы көрсеткішпен салыстырғанда тасымалданған жүк көлемі 51 415 тоннаға көбейіп, вагон саны 747-ге ұлғайған.
«Жамбыл цемент өндіру компаниясы» ЖШС есепті кезеңде 269527 тонна жүк тасымалдап, қосымша 1681 вагонды іске қосқан.
Жүк айналымы төмендеген «Тараз қант зауытында» көрсеткіш 47,55 пайызға кеміген. «Шығыс кен басқармасы» серіктестігінде – 30,6, «Балқаш түсті металл» ЖШС-да 20,4 пайызға жүк тасымалы азайған.
Жергілікті билік өндіріс көлемін арттыру үшін индустриялық аймаққа инвесторлар тартуды қолға алуда. Кәсіпорындар жұмысын жандандыру үшін әкімдік тарапынан инфрақұрылымды дамытуға көңіл бөлініп, теміржол тұйықтарын салуда. Бұл қадам алдағы уақытта аймақтағы ахуалды жақсартып, жүк айналымының артуына ықпал етеді деген үміт бар.