Эстониялық Operail операторының сатылымдағы вагондарының басым көпшілігін Қазақстан алған
Эстонияның Operail мемлекеттік операторы еншілес ұйымы Operail Finland-ты финдік Nurminen Logistics компаниясына сатқаннан кейін өз активтерін сатуды жалғастыруда. Оператор 22,1 млн еуроға 807 вагон сатқан, оның басым көпшілігін Қазақстан сатып алған, деп хабарлайды Rail-news.kz.
Оператор сатылымға шығарған 807 вагонның 410-ын қазақстандық ATASU логистикалық концерны сатып алса, қалған 397-ін эстондық Skinest Rail компаниясы алған.
Бұл Operail Leasing кәсіпорын активтерінің сатылымға шығарылған екінші кезеңі, еншілес мекеме бұған дейін вагондарын жалға беріп келген. Бұның алдында 522 вагон екі компанияға сатылған. Ол кездегі келісімнің жалпы сомасы 6,51 млн еуро көлемінде болды.
Operail операторының мәліметінше, жалға берілген вагондар негізінен Қазақстан, Тәжікстан, Моңғолия және Балтық елдеріне қатынап отырған және көп табыс әкелген.
2016 жылы Эстония мемлекеті вагондарды жалға беру бизнесінен кету жөнінде шешім шығарған, биліктің айтуынша бұл маңызды стратегиялық салаға жатпайды. Дегенмен, бұл бизнестен кету 2021 жылдың көктемінде басталды. Бір жылдан кейін Operail Leasing кәсіпорнын жартылай жекешелендіріп, оның мүліктерін сатылымға шығару жөнінде шешім қабылданды.