Негізгі меже – пойыз жылдамдығын 120-140 км/сағатқа дейін жеткізу

Жамбыл магистральдық желі бөлімшесінде пойыздардың транзиттік әлеуетін және қозғалыс жылдамдығын арттыру үшін инфрақұрылымды жаңғырту жұмыстарына үлкен мән берілуде.

Негізгі меже – пойыздар қозғалысының жылдамдығын 120-140 км/сағатқа дейін жеткізу. Жамбыл магистральдық желі бөлімшесінің бастығы Мейрамбек Кенжебаевтың айтуынша, басым бағыт жолдың негізін темірбетон шпалдарға ауыстыру жұмыстарына берілуде.  

– Соңғы бес жылда бөлімшенің 192,64 шақырым жолына жүргізілген күрделі жөндеу жұмыстары барысында 242 556 жаңа темірбетон шпалдары салынды. Жамбыл өңірінде 26,05 шақырым жолға күшейтілген орташа жөндеу, сондай-ақ 1,3 шақырымға орташа жөндеу жүргізілді. Негізгі бағыт бойынша 213 жиынтық мөлшерінде жаңа темірбетон арқалықтардың бағыттамалық бұрмалары ауыстырылды. Жалпы жол дистанцияларының теңгерімінде барлығы 1674 бағыттамалық бұрма жиынтығы бар. Оның 719-ы басты айналымда, – дейді Мейрамбек Сермағанбетұлы.

Шу – Отар учаскесі бойынша пойыздарды өткізу қабілетін арттыру үшін Алайғыр станциясына 2/4 және Көктөбе станциясына 5/7 жаңа бағыттамалы қылтасы салынды. Күшейтілген орташа жөндеу жүргізілген жолдардан шыққан темірбетон торы Бірлік-2 станциясын қалпына келтіруге пайдаланылуда. 29 мың текше метр жолға қиыршық тас төселген соң, темірбетон негізіндегі бағыттамалық бұрмалардың 32 жаңа жиынтығы салынбақ.  

– Магистральды күрделі, орташа және ағымдағы жөндеу кезінде жол шаруашылығы кәсіпорындарында Шу машиналандырылған жол дистанциясының техникасы пайдаланылады, оның паркінде 61 бірлік арнайы машина бар. Ал ұзындығы 800 метр бунаққа жаңа рельстерді дәнекерлеумен Луговой рельс дәнекерлеу кәсіпорны айналысады. Техникалық жабдықталуы жағынан алсақ, тікелей жолдарда өздігінен жүретін жол рельсті дәнекерлеуші, типті жылжымалы машиналары бар кәсіпорынның мұндай жұмыстарды атқаруға мүмкіндігі мол, – деп түсіндіреді филиал директоры.  

Былтыр Сарышаған, Шығанақ, Шу, Түрксіб, Тараз станцияларында желілік-аппараттық залдардың өңірлік байланыс тораптарын жаңғырту жұмыстары жүргізілген болатын. Залдарда жаңа бағдарламалық-аппараттық жабдықтар кешені іске қосылды.  

Биыл Жамбыл магистральдық желі бөлімшесінің автопарктері біршама жаңартылды. Атап айтсақ, «DONGFENG» маркалы 14 автомобиль, қалпына келтіру пойызына арналған 1 ЧЕТРА Т-35 бульдозері және 1 МПТ-6 мотовозы сатып алынды. Қысқасы, аймақта инфрақұрылымның қарқынды жаңаруы жүріп жатыр.