ҚТЖ басшылығы Балқаш – Достық және Алтынкөл – Жетіген учаскелеріндегі инфрақұрылымдық жобалардың жүзеге асырылу барысын тексерді
2025 жылғы 13-17 мамыр аралығында «ҚТЖ» ҰК» АҚ Басқарма төрағасының орынбасары Талғат Алдыбергенов, «ҚТЖ» ҰК» АҚ – «Магистральдық желі дирекциясы» филиалының директоры Сәкен Рахметов мердігер ұйымдар өкілдерімен бірлесіп дрезинада Балқаш – Достық және Алтынкөл – Жетіген маршруты бойынша жұмыс сапарын жасады, деп хабарлайды Rail-news.kz.
Балқаш, Ақтоғай, Достық және т. б. станцияларында Достық – Мойынты учаскесінің екінші жолдарын салу шеңберінде теміржол инфрақұрылымы объектілерінің дайындығы тексерілді.
Сондай-ақ, аралау барысында «Алтынкөл – Жетіген теміржол учаскесін жаңғырту», «Алматы айналма жолының құрылысы», «Достық – Алашаңқай шекарамаңы станциялары арасындағы екінші жолдардың құрылысы» жобаларын іске асыру мәселелері қаралды. Мердігер ұйымдарға учаскелерде инфрақұрылым объектілерін салу кезінде кемшіліктер көрсетілді, ескертулерді жою мерзімдері белгіленді.
Компаниялар басшылығы Алтынкөл – Шелек учаскесі бойынша үш жүк құрамының тепловоздарымен жүрумен СИРДП-Е радиоблоктау жүйесі жұмысымен танысты.
Өңірлік басшылар бөлімшелердің проблемалық мәселелері және инфрақұрылымды күтіп ұстау мен дамыту, механикаландырумен қамтамасыз ету, жұмыскерлердің санитарлық-тұрмыстық жағдайларын жақсарту жөніндегі іс-шараларды, вокзал шаруашылығын күрделі жөндеу жөніндегі жоспарларды орындау жөніндегі ұсыныстар туралы баяндады.
