Мойынты – Қызылжар теміржол желісінің құрылысына 10 мердігер ұйым қатысуда
Мемлекет басшысының тапсырмасы бойынша елімізде ұзындығы 323 шақырым Мойынты – Қызылжар теміржол желісін салу жобасы жалғасуда, деп хабарлайды Rail-news.kz.
Ол Достық – Мойынты бағытын жалғастырып, Транскаспий бағытының негізгі буыны – Трансқазақстандық теміржол дәлізін дамытуға мүмкіндік береді.
Жоба мақсаты – елдің транзиттік әлеуетін арттыру, Мойынты – Жарық учаскесінде шамадан тыс жүктемені азайту, «тар жерлерді» жойып, бағытты оңтайландыру арқылы жеткізу мерзімін қысқарту.
Жаңа желі Қарағанды және Ұлытау облыстарының экономикалық белсенділігін арттырып, өңірдің экспорттық және логистикалық мүмкіндіктерін кеңейтіп, Қазақстанның көлік жүйесінің бәсекеге қабілеттілігін нығайтады.
Қазіргі уақытта бүкіл жол бойында жер құрылыс жұмыстары жүріп жатыр. Жобаға 10 мердігер ұйым, 300-дей техника және 750 жұмысшы жұмылдырылған.
Құрылыс 2026 жылы аяқталады деп жоспарланған.