Сексеуіл стансасында жаңа вокзал құрылысы қарқын алды
Сексеуіл стансасында жаңа теміржол вокзалының құрылысы қарқынды жүріп жатыр. Нысанның жұмыс барысымен облыс әкімі Мұрат Ергешбаев, облыстық мәслихат төрағасы Мұрат Тлеумбетов және бірқатар ел ағалары танысты, деп хабарлайды Rail-news.kz.
Жобаны «Қазақстан темір жолы» ҰК» АҚ жүзеге асыруда. Бас мердігер ретінде «Техоснастка-Ремсервис» серіктестігі жұмыс атқарып жатыр. Құрылысқа жалпы 700 млн теңге бөлінген.
Қазіргі таңда нысанның негізгі құрылыс жұмыстары аяқталуға жақын. Ғимараттың сыртқы қаптауы толық орындалып, ішкі әрлеу жұмыстары аяқталған, есіктері орнатылған. Енді аумақты абаттандыру, жаяу жүргіншілер жолын реттеу және инфрақұрылымды дамыту жұмыстары жүргізілуде.
Жаңа вокзал іске қосылғаннан кейін жолаушыларға қолайлы жағдай жасалып, қызмет көрсету сапасы артады деп күтілуде. Сондай-ақ нысан өңірдің көлік-логистикалық әлеуетін күшейтіп, жолаушы тасымалының тиімділігін арттыруға ықпал етеді.
Айта кетейік, Қызылорда облысы аумағынан жалпы ұзындығы 1051,7 шақырым магистральдық теміржол өтеді. Өңірдегі теміржол инфрақұрылымында 8 вокзал және 2 қызмет көрсету пункті жұмыс істейді. Тәулігіне 15 жұп жолаушылар пойызы қатынайды.
Сонымен қатар, Қызылорда қаласынан Астана, Петропавл, Павлодар, Көкшетау, Семей және Түркістан бағыттарына 6 жұп жолаушылар пойызы ұйымдастырылған. «Қызылорда – Бесарық – Түркістан» әлеуметтік маңызы бар бағыт та өңірдің оңтүстік аймағындағы 26 елді мекен тұрғындарын тұрақты көлік қатынасымен қамтамасыз етіп отыр.
