Алпыс сағаттық ауқымды жұмыс

Жамбыл магистральдық желі бөлімшесінің Ақшолақ – Үшбұлақ аралығындағы тақ жолдың 3542-3536 шақырымдары аралығында 60 сағаттық технологиялық толаскез өтті. Рельстік тіректерді жаппай ауыстыру жұмысына Жамбыл филиалынан 100-ден аса маман жұмылдырылып, Шу және Ағадыр машиналандырылған жол дистанциялары тартылды.

Ауқымды жұмысқа арнайы жол машиналарының қосылуы жөндеу жұмыстарын сапалы орындау мүмкіндігін арттырды. Айталық, СМД машинасы ескі шпалдарды жаңаларына ауыстырса, МКТ жол жиегіндегі қиыршықтасты шпалдарға жылжытып,тегістеп берді. Ал РМ арқылы ескі шағылтасты тазартып, ХДВ көмегімен жаңасын төсеп болған соң, ЭЛБ, ВПО, ДМ, ДГС және ПБР машиналары жолды түзеп, тазартып, нормативтік-техникалық құжаттардың талаптарына сәйкестендірді.  

– Рельстік тіректерді ауыстыру, жалпы теміржол инфрақұрылымының техникалық жай-күйін жақсарту – пойыздар қозғалысының қауіпсіздігін қамтамасыз етуге мүмкіндік береді. Технологиялық толаскез уақытында Ақшолақ – Ақыртөбе аралығында ұзындығы 8 шақырым жұп жолдың 3565 км ПК 1-ден 3572 км ПК 10-ға дейін және ұзындығы 6,6 шақырым тақ жолдың 3542 км ПК 8-ден 3536 км ПК 3-ке дейінгі аралықта шпалдардың тозуына байланысты рельстік тіректер ауыстырылды. Сонымен қатар жұп жолдың аталған учаскесіндегі рельс бекіткіштердің КПП-5 үлгісін SKL-14-ке, ал Ақшолақ – Үшбұлақ аралығындағы тақ жолда ЖБР түрін SKL-14 бекіткіштеріне ауыстырдық. Алматы қаласындағы «Бент» фирмасынан Ақшолақ станциясына – 14 720 дана, Талас станциясына 12 320 дана Фоссло шпалы жеткізілді, – дейді Жамбыл жол дистанциясының бастығы Дәулетбек Несіпбекұлы.  

Дистанция бастығының айтуынша, осыған дейін бұл жол аралығында тозған шпалдардың әсерінен түсетін күшке төтеп бере алмай, жол ені кеңейіп, рельстер сыртқа қарай «теуіп», пойыздар қозғалысының қауіпсіздігіне қатер төндіріп тұрған. Соған байланысты аталған учаскеде локомотивтердің жылдамдығына шектеу қойылып келген. Жол өлшегіш вагон және жылжымалы диагностикалық кешендері арқылы тексеру жүргізіп, 3,4 дәрежелі ақаудың бары анықталған соң ауқымды толаскез алып, бүгінгі жөндеу жұмыстары жоспарланған. Рельстік тіректерді ауыстыру жұмыстары 60 сағаттық толаскез аясында толық аяқталды.  

Айта кетейік, СМД-80 кешенді жол машинасы – ТМД бойынша жалғыз дана. Бұл машинаның экономикалық тұрғыда өте тиімді және күрделі жөндеу жұмысы аяқталғаннан кейін пойыздар қозғалысы жылдамдығын тез арада қалыпты жағдайға келтіретіні қазіргі таңда атқарылған жұмысымен дәлелденіп отыр.