ҚТЖ-ның үздік инновациялық жобасы халықаралық «Digital Bridge» форумында таныстырылды

Қазақстан Республикасының Президенті Қасым-Жомарт Тоқаев «Digital Era Lifestyle» тақырыбында өткен дәстүрлі «Digital Bridge» халықаралық технологиялық форумына қатысты. Үшінші рет өткізіліп отырған жиында Мемлекет басшысына «ҚТЖ» ҰК» АҚ мен «Транстелеком» компаниясының бірлескен жобасы «Энергодиспетчерлік тартым» автоматтандырылған басқару жүйесі» (ЭДТ АБЖ) жобасы таныстырылды. ЭДТ АБЖ – сервистік модель көмегімен енгізілген Қазақстанның теміржол желісіндегі ірі стратегиялық инвестициялық жоба. Бүгінде локомотивтік тартымның энергетикалық тиімділігін арттыруға бағытталған инновациялық цифрлық жоба игілігін теміржолшылар көріп отыр. Мемлекет басшысына әрбір локомотивті нақты уақыт режимінде бақылауға мүмкіндік беретін жүйенің жұмысы жан-жақты таныстырылды. ЭДТ АБЖ көп деңгейлі жүйе болып табылады. Жүйе бірнеше секунд ішінде ағымдағы жылдамдық, нақты координаттар, резервуардағы отын көлемі және отын тұтыну режимі туралы ақпарат алуға көмектеседі және ол әрбір 5 минут сайын GSM желілері арқылы беріледі. Сонымен қатар әр сапардың нәтижелерін тіркеп, отын үнемдеу және нормадан тыс тұтыну сияқты нормадан ауытқуларды ескереді. Ал алынған мәліметтерді мамандар талдайды. Жобаны іске асырудың оң нәтижесін қарапайым мысалдан көруге болады. Мәселен, ЭДТ АБЖ жүйесі енгізілгенге дейін локомотив бригадасының жұмысын бақылап және есепке алуды машинист қағазға қолмен толтырып келді. Ауысым соңында машинист негізгі құжатты тапсырғаннан кейін, деректер бірнеше рет әртүрлі ақпараттық жүйелерге енгізілуі керек болатын. Ал бұл қосымша жұмыс әрі көп уақытты қажет ететін. ЭДТ АБЖ енгізілгеннен кейін локомотив бортынан деректерді және әртүрлі параметрлерді автоматты түрде жинау есебінен машинистің сапары туралы ақпаратты қолмен енгізу көлемі барынша қысқарды. Өйткені, теміржол желісіндегі барлық негізгі нүктелер бойынша ДЖБ (деректерді жинау және беру пункттері) орнатылған, машинистерге машинистің дербес сәйкестендіргіші болып табылатын ТЖМ (тасымалданатын жады модулі) берілген. Функционал енгізілгеннен кейін пойыздар қозғалысының қауіпсіздігі мәселелерінде қосымша бақылау пайда болды. Бүгінгі таңда ұлттық компаниядағы локомотив паркінің 94% осы жүйеге интеграцияланған. Локомотивтерді инновациялық жобамен жабдықтау бойынша жобаның инвестициялық фазасы 3 жылға созылып, 2012-2015 жылдар аралығын қамтыды. 2014 жылы – жүйенің бағдарламалық жасақтамасы өнеркәсіптік пайдалануға енгізілді. Ал 2020 жылы Транстелеком жүйеге тауар таңбасын тіркеуді жүзеге асырды.