Көлік саласындағы кедергілер жойылуда

ҚР Көлік министрлігі теміржол және су көлігі комитеті төрағасының орынбасары Нұржан Келбұғанов Қазақстанның көлік саласында қиындық келтіретін негізі факторларды атады. 

Оның айтуынша, локомотивтер жетіспеушілігі, ел инфрақұрылымындағы «тар» орындар тасымал үдерісінің дамуына кедергі келтіреді. Бұл мәселелер локомотивтер сатып алу есебімен оң шешімін тауып отыр.

– Биыл локомотив паркі бойынша жағдай жақсарды. 2024 жылдың соңына дейін 185 локомотив, яғни 121 магистральдық және 20 маневрлік тепловоз, сонымен қатар 44 электровоз сатып алынады. Оның 130-ы бүгінге дейін жеткізілді. Сондықтан бұрын вагондар жинау және беруді кешіктіру негізгі мәселе болып келсе, биыл ол қиындық болмауы тиіс. Маневрлік локомотивтердің алғашқы легі жеткізіліп, олардың бәрі еліміздің егін оратын өңірлеріне жөнелтілді. Бүгінгі таңда теміржол желісінде резервте тұрған локомотивтер бар. Тасымал көлемі арта қалған жағдайда олар іске қосылатын болады, – дейді Н.Келбұғанов.  

Сонымен қатар ол астық тасымалы нарығындағы қазіргі жағдайды да баяндады. Қытай тарапы сақтық танытып, қабылдайтын жүк көлемін 150-180 мың тоннаға дейін шектеп отырғанын жеткізді. Атап айтқанда, бидайды қабылдауға қолданыстағы тыйым айтарлықтай шектеулер қояды және тек арпа экспортына рұқсат етіледі, бұл логистикалық схемалар мен коммерциялық стратегияларға айтарлықтай әсер етеді. Осыған байланысты «ҚТЖ-Жүк тасымалы» ЖШС қолда бар мүмкіндіктерді барынша тиімді пайдалану үшін жеткізілімдерді реттеу мен үйлестіруді жүзеге асыратын болады.  

– Біздің теңіз порттарымыз астық қабылдауға дайын, Ақтау порты 3 млн тоннаға дейінгі көлемді қабылдап, жөнелтуге әлеуетті. Бұл отандық тауар өндірушілер үшін қосымша мүмкіндіктер ашып, қытай тарапының шектеулерін азайтуға септік етеді, – дейді спикер.