Ауа райы нашарлаған кезде ҚТЖ пойыздардың қауіпсіз қозғалысын қамтамасыз ету үшін қосымша шаралар енгізеді
«ҚТЖ» ҰК» АҚ ауа-райының нашарлауы кезеңінде пойыздар қозғалысының қауіпсіздігін қамтамасыз ету мақсатында іс-шаралар кешенін қабылдайды, деп хабарлайды Rail-news.kz.
2025 жылғы 10 желтоқсанда Достық станциясында ауа-райының күрт нашарлауы орын алды: қар түрінде жауын-шашын кезінде солтүстік-батыс желінің жылдамдығы 20 м/с-тан астамға жетті. Қарлы бораннан көру мүмкіндігі нөлге тең болды.
Ауа райының қолайсыздығына байланысты Достық станциясында маневрлік жұмыстар 10.12.2025 ж. сағ. 20:15 – 11.12.2025 ж. сағ. 02:00 аралығында уақытша тоқтатылды.
Қардан тазартуға 114 теміржолшы тартылды, оның ішінде түнде – 67 қызметкер. Қазіргі уақытта бағыттамалық бұрмаларды қардан тазарту бойынша 25 қызметкер жұмыс істеуде.
Бескөл – Достық учаскесінде және Достық станциясының өзінде 30 м/с дейін екпінді дауылды жел пойыздық және маневрлік жұмыстарда қиындықтар туғызды, соның салдарынан осы бағытта жүк тасымалы мәжбүрлі түрде шектелді.
Бұдан басқа, Шу – Шығанақ және Шоқпар – Алайғыр темір жол учаскелерінде ауа райының нашарлауына байланысты қауіпсіз өтуді қамтамасыз ету мақсатында пойыздар қозғалысының жылдамдығы төмендетілді.
Синоптиктердің мәліметінше, желтоқсан айында Қазақстан аумағында жауын-шашын көбінесе қар түрінде, кей жерлерде екпінді жел мен боран болады деп болжануда.
Желдің тұрақты соғуы аймағы болып табылатын Көктұма – 16 рзд. учаскесінде қолайсыз ауа-райы жағдайлары тағы бірнеше күнге созылады деп күтілуде.
Алтынкөл – Қорғас шекара өткелі штаттық режимде жұмыс істейтінін атап өтеміз.