Теміржол өткелінде көлік істен шығып, жүк пойызы шұғыл тоқтауға мәжбүр болды
12 тамызда Қарағанды – Сұрыптау – Астана теміржол учаскесіндегі күзетілетін және реттелетін өткелде жол-көлік оқиғасының алдын алынды, деп хабарлайды Rail-news.kz.
Сағат 12:52 шамасында Volkswagen T4 автокөлігі ілінісу жүйесіндегі ақауға байланысты теміржол өткелінде тоқтап қалған. Сол уақытта өткелге салмағы 1,1 мың тоннадан асатын жүк пойызы жақындап келе жатқан.
Пойыз сағатына 76 шақырым жылдамдықпен қозғалған. Жағдайды байқаған машинист шұғыл тежеуді қолданып, соқтығысудың алдын алды. Теміржол өкілдерінің мәліметінше, өткелдегі жылжымалы дабыл құрылғылары штаттық режимде жұмыс істеген.
Теміржолшылар көлік құралын жолдан қысқа мерзім ішінде алып шығып, пойыз қозғалысын қайта жалғастырды. Оқиға салдарынан жүк пойызы 10 минутқа кешікті.
Оқиға туралы ақпарат Теміртау станциясындағы полиция бөлімшесіне берілді.
«ҚТЖ» компаниясы жүргізушілерді жол қозғалысы ережелерін қатаң сақтауға және теміржол өткелдерінен өту кезінде қауіпсіздік талаптарын орындауға шақырады. Мамандардың айтуынша, көлік құралы өткелде істен шыққан жағдайда жүргізуші барынша жылдам әрекет етіп, теміржол қозғалысына қауіп төндірмеуі қажет.