Олжас Бектенов пойыз жолаушылары үшін жағымды жаңалықты айтты
Премьер-министр Олжас Бектенов депутаттық сауалға берген жауабында жолаушылар пойыздарының бірінің бағытын ұзарту жоспары туралы айтты, деп хабарлайды Rail-news.kz.
Ол 2026 жылы 91 вагон жеткізілетінін еске салды. Оның ішінде: Астана – Шымкент бағыты бойынша 2 құрам, Астана – Атырау бағыты бойынша 2 құрам және Астана – Жезқазған бағыты бойынша 1 құрам қарастырылған, деп жазды Zakon.kz.
«Сонымен қатар, 2026 жылдың сәуір айынан бастап Маңғыстау облысын дамытудың кешенді жоспарын орындау аясында Қарағанды – Жезқазған жолаушылар пойызының бағытын Ақтау қаласына дейін ұзарту жоспарлануда. Жалпы алғанда, 2030 жылға дейін 1 000-ға жуық вагонды жаңарту көзделген», — делінген жауапта.
Сондай-ақ, Үкімет басшысының айтуынша, Қарағанды – Балқаш облыстық пойызының құрамы 4-тен 6 вагонға дейін көбейтілген. Биыл жазғы кезеңде, маусым мен тамыз аралығында, 6 вагоны бар қосымша Қарағанды – Балқаш облыстық пойызының күнделікті қатынауы ұйымдастырылды.
Бұдан бөлек, Бектеновтің мәліметінше, осы жылдың 1 наурызынан бастап екі вагоны бар Алматы – Балқаш – Алматы күнделікті тікелей пойызы іске қосылған.