Әбжалиевтер әулетінің еңбек жолы
Әбжалиевтер әулетінің еңбек жолы Трансқазақстан темір жолының Шу-Мойынты учаскесінің алғашқы шпалдарын төсеуден басталды.
Әулеттің негізін салушы – алғаш жол салушы әрі жолшы, еңбек және Ұлы Отан соғысының ардагері Қылышбай Әбжалиев.
Қылышбай Әбжалиев 1913 жылы 6 қаңтарда Қызылорда облысында дүниеге келген. Темір жолға кездейсоқ тап болған. Соғыс кезінде теміржолшы тұтқынға түседі. 1948 жылы елге оралған соң Трансқазақстан темір жол желісінің құрылысына жіберіледі. Осылайша №157 құрылыс-жөндеу пойызына жұмысқа тұрады.
Жұмыс ауыр еді. Барлығын қолмен атқаратын, ешқандай механика болмады. Құрылыс материалдарын тасымалдау үшін түйе арбалар пайдаланылатын. Мұндай жұмыс күш пен төзімділікті қажет етеді. Темір жол учаскесінің ашылуы өңірдің жақсы өмір сүруіне, ел экономикасының дамуына, жергілікті халық үшін жаңа жұмыс орындарының пайда болуына әкеледі деген сенімде болды.
Қылышбай Әбжалиев өзінің еңбекқорлығы мен табандылығының арқасында әріптестері арасында үлкен беделге, басшылық тарапынан құрметке ие болды. 1949 жылы жол дистанциясының жұмысшысы, бес жылдан кейін Қияқты стансасы, Шығанақ жол дистанциясының жұмысшысы болып ауысты. 20 жылдан астам Қияқты станциясы жол дистанциясының 5-санатты жолшысы болып жұмыс істеді. 1977 жылы лайықты демалысына шықты. Еңбек ардагерінің теміржолдағы жалпы еңбек өтілі 30 жылға жуықтайды.
Еңбек ардагері 1974 жылы «Еңбек Қызыл Ту» орденімен, Ұлы Жеңіске арналған мерейтойлық наградалармен марапатталған. 1975 жылы «Тоғызыншы бесжылдықтың екпіндісі» атанды. Ол еңбекқорлығы, жауапкершілік пен тәртіптілігімен ерекшеленді.
Ұлы Отан соғысының ардагері 82 жасында дүние салды.
Жұбайы Нәсіп екеуі бес бала тәрбиеледі. Қазір атасының жолын немерелері темір жол саласында жалғастырып жатыр.
