Теміржолшылар әулеті атанған Қарымбаевтар жайлы бір үзік сыр

Вагон доңғалақтары рельсті сарт-сұрт соққан сайын соғыстан қайтқан солдаттың да жүрегі кеудесінен шығып кетердей болып дүрсілдеген... Жолшыбай әр станцияда майданға кеткен жақынын күткен жандардың пойызға зарыға қарағанын көргенде шойын жол – үміт жолы деп түйген.

Қуаныш Қарымбаев 1947 жылы туған жерге табаны тигенде теміржолшы боламын деп шешіп, Шу локомотив пайдалану депосына келіпті. «Мен де талай жанның арманын арқалап, үмітін жаққан шойынжолдың бойынан бақытымды тапқым келеді» депті. Осы бір ауыз сөзі ауыздан-ауызға көшіп жүріп, немере-шөберелеріне де жеткен. Жұбайы Үмітжан Бегімбекова екеуі тәрбиелеп өсірген бес ұл, бір қызы, солардан тараған немере-шөберелері де бүгінде атаның үміт жолын жалғап келеді.  

Теміржолшылар әулеті атанған Қарымбаевтардың шойын жолдың бойындағы еңбек дәстүрін осылайша аталары Қуаныш бастапты. Шу локомотив пайдалану депосында алғашында паровоз, кейін тепловоз машинисінің көмекшісі болып 38 жыл еңбек еткен Ұлы Отан соғысы ардагерінің жары Үмітжан Тастанбекқызы да 14 жылын осы салаға арнапты.  

– Әкем Есенкелді отбасының тұңғышы. Алматы көлік инженерлерінің институтында инженер-механик мамандығы бойынша білім алған. 1973-2019 жылдар аралығында жұмысшы, слесарь, бригадир, шебер, технолог, өндірістік оқыту шебері, өндіріс жұмысы бойынша директордың орынбасары, бас технолог, техникалық бақылау қызметінің бастығы, диспетчер, еңбекті қорғау инженері қызметтерін атқарды. Қазір зейнеттік демалыста. Теміржол саласында 46 жыл еңбек етті. «Қамқор локомотив» ЖШС-нің «Даңқты еңбегі үшін» төсбелгісімен марапатталған және көптеген Алғыс хаттардың, Құрмет грамоталарының иегері. Жалпы теміржолда ұзақ жыл еңбек еткен әкем болса, одан кейінгі бауырларының еңбек өтілі де аз емес, Нұржан – 41, Бақытбек – 17, Жақыпбек – 38, Құрманғазы – 35 жылға жеткен, – дейді «ҚТЖ-Жүк тасымалы» ЖШС Жамбыл ЖТ бөлімшесі еңбекті қорғау және экология бөлімінің бастығы Медет Қарымбаев.  

Қуаныш Қарымбаевтың немересі Медет Есенкелдіұлы да 2008 жылы М.Тынышпаев атындағы Қазақ көлік және коммуникациялар академиясын «Жол қатынастары инженері» мамандығы бойынша бітірген. Теміржол саласында 15 жыл үздіксіз қызмет етіп келеді. Теміржолшылар династиясында атасы мен әжесінен кейін әулеттің үш буыны, 10 бірдей өкілі еңбек етіп келеді. Олардың жалпы еңбек өтілі – 330 жылды құрауда. Қарымбаев Қуаныштың еңбек жолын 5 ұлы, 5 немересі жалғастыруда. Теміржолшылар әулетінің даңқты еңбек жолы былтыр облыстық «Мерейлі отбасы» байқауына қонақ ретінде шақырылып, арнайы дәріптелген.