Машинист екі бірдей апаттың алдын алды
"Қазақстан теміржолшысы" газетінің Жамбыл облысындағы меншікті тілшісі
«Ақтөбе – Алматы» бағытындағы №34 жолаушылар пойызының машинисі екі бірдей төтенше жағдайдың алдын алды.
Оқиға Аспара – Шу учаскесінде орын алған. Тракторшы «пойыз келгенше өткелден өтіп кетемін» деп асыққан. Трактор өтуін өткенмен, артындағы шөп тиелген тіркеме тура жолдың үстінде ажырап қалған. Абырой болғанда, машинист локомотивтің тежегішін тартып, пойызды тіркемеге 2 метр қалғанда шұғыл тоқтатып үлгерген.
Екінші оқыс жағдай Қорағатты – Тәтты аралығындағы қараусыз, реттелетін өткелде тіркеліпті. Бұл жолы теміржолға кенет автобус шығып кеткен. Жолаушылар пойызының машинисі тағы да оқыс тежегішті қолданып, соқтығыстың алдын алды. Автобус жүргізушісі оқиға орнынан қашып кеткен. Ақпарат құқық қорғау органдарына берілді.
Осы оқиға туралы ести сала Жамбыл локомотив пайдалану депосына хабарластық. Депо бастығының пайдалану жөніндегі орынбасары Мәди Қонысбаев «Ақтөбе – Алматы» бағытындағы жолаушылар пойызындағы бригаданың Таразға ауысымдық демалысқа келгенін айтқан соң, машиниспен кездесуге асықтық.
Машинист Марат Абызов пен көмекшісі Бағлан Ермеков көп сөзге жоқ, өз ісін жақсы білетін мамандар екен. Айтуларынша, күндіз-түні, қысы-жазы жолда жүрген 12 жылда алғаш рет осындай жағдайға тап болыпты.
– Алты жыл машинист көмекшісі болдым, локомотивті тізгіндегенім кейінгі алты жылда. Осы уақыт аралығында бірінші рет пойызды шұғыл тоқтатуыма тура келді. Тіркемеге де, локомотивке де зақым келген жоқ. Бастысы, жолаушылар дін аман. Ешкім наразылық танытпады. Тракторшы 3 минутта тіркемесін тіркеп, жолдан шығарған соң, жүріп кеттік. Шуға графиктен кешікпей, уақытында жеттік, - дейді Марат Абызов.
Машинистің көмекшісі де 11 жылдық еңбек өтілі бар тәжірибелі маман екен. Екеуі де жоғары білімді.
«Орын алған оқыс оқиға кезінде екеуі де дер кезінде дұрыс шешім қабылдады. Талаптар нұсқауға сай орындалды», - дейді бригаданың нұсқаушысы Ербол Құрбанов.
Теміржол — аса қауіпті аймақ. Қателікті кешірмейді. Ал өткелден асығыс өтемін деудің соңы осындай жағдайға әкеліп соғуы мүмкін. Асығыстық пен салғырттықтың орны толмас зардаптары бар.