Қысқа дайындық пысықталуда

Маңғыстау белгі беру және байланыс дистанциясының биылғы жұмысында біраз ілгерілеушілік байқалады. Қауіпсіздікке нұқсан келтіретін факторлар да азайған. Жақында күзгі комиссиялық байқаудан өткен мекеме үш тоқсанды да оң қорытындылап отыр.  

Биыл рельс тізбектерінің ақаусыз жұмысын қамтамасыз ету мақсатында Бейнеу мен Маңғыстау аралығында Сапа эталонына келтіру жұмыстары жүргізілуде. Телім бастығы А.Бабакуловтың ұйымдастыруымен бұл жұмыс әлі де жалғасуда. СОБ қондырғысы, соның ішінде жол қорапшалары мен литерлік белгілер сырланып, жөнделуде. Дистанция мамандарының айтуынша, литерлік белгілердің жаңаруына әсіресе машинистер риза. Себебі сырланып, жөнделген белгілер анық байқалып, жақсы көрінуде екен.  

– Станция мен бекеттердегі автоматты басқару жүйесін, СОБ қондырғыларын, байланыс, радиобайланыс жабдықтарын және КТСМ құрылғыларын күтіп ұстау, сонымен қатар олардың ақаусыз жұмыс жасауын қамтамасыз ету бағытында биыл аз жұмыс атқарылған жоқ. 198 шақырымдағы блок постта контактілі КПТШ-515 блогы заманауи ТМ -15 блогына ауыстырылды. СОБ кабельдеріне жөндеу жұмыстары жүргізілді. Жер бетіндегі муфталар сапасы жоғары СЦБС жерасты муфтасына ауыстырылды. Сонымен бірге СОБ, байланыс, КТСМ, ҮАЛС, радиобайланыс қондырғылары түгел тексеруден өткізіліп, күзгі байқау аясында қысқа дайындық жұмыстары пысықталуда, – дейді Маңғыстау белгі беру және байланыс дистанциясының бастығы Кеңғали Асқанбаев.

Дистанция басшысы алдағы жоспарларымен де таныстырды. №16 бекетте бұған дейін электрлік орталықтандыру постының орнына жұмысшыларға барлық жағдайы жасалған модульдік ғимарат орнатылған болатын. Енді СОБ, байланыс, радиобайланыс қондырғыларын осы ғимаратқа ауыстыру жоспарланыпты. 17 қазаннан 10 қарашаға дейін №16 бекет толық орталықтан ажыратылып, осы жұмыстар жүргізілмек. Оған қоса алдағы уақытта «Р» және «Тамақ» бекеттерінде дауыс үдеткіш құрылғысы жаңа микропроцессорлы қондырғыға ауыстырылатын көрінеді.  

Айта кетейік, дистанцияда өткен жылдың тоғыз айында тоғыз ақауға жол берілсе, биыл жеті ақау орын алған. Яғни, екі ақауға болса да азайған.