Өрт сөндіру пойызының ұжымы дайындықтарын пысықтады

Қызылорда магистральдық желі бөлімшесіне қарасты №31 Қызылорда өрт сөндіру пойызының ұжымы Қызылорда станциясының кірме жолында тұтанған өртті 28 минут ішінде ауыздықтап, апаттың алдын алды.

«Жүк вагонында тұтанған өртті сөндіру» тақырыбында жергілікті өрт ұжымдарымен бірлесіп өткізген өрт-тактикалық оқу-жаттығу кезекті шеберлікті шыңдау сабағы болды. Тілсіз жауды ауыздықтауға Қызылорда өрт сөндіру пойызынан, Әскерилендірілген теміржол күзетінен, Қызылорда станциясынан, Қызылорда локомотив пайдалану депосынан жалпы саны 62 адам қатысып, 8 техника жұмылдырылды.  

– Қызылорда станциясының кірме жолындағы жанармай құйылған жүк вагонында өрт тұтанғаны жайлы дабыл түскен сәттен бастап өрт сөндіру пойызының оқиға орнына жетуі, өрт сөндіруге дайындығы, әрі қарайғы іс-әрекеті секілді барлық талаптар сауатты атқарылып, тілсіз жауды ауыздықтауға берілген шартты уақыт ішінде ауыздықталды, – деп мәлімет берген Қызылорда өрт сөндіру пойызының бастығы Рыспек Шадаев әріптестерінің оқиға орнына жедел жетіп, әбжіл қимылдаудағы іс-әрекетін жоғары бағалады.  

Тактикалық оқу-жаттығу станцияның маневрлік диспетчері Ғ.Әбішевтің 11 сағат 30 минутта вагонның түтіндегенін хабарлаған дабылынан басталған. Бір минут өткенде №11 бұйрық бойынша Қызылорда өрт сөндіру пойызына оқиға орнына келуге пәрмен беріліп, 3 минут ішінде машинист Сайлаубаевтың басқаруындағы ТЭМ-2 тепловозымен Өрт сөндіру пойызы оқиға орнына жеткізілді. Бұл кезде 11 сағат 38 минут болған. Бір минут оқиға алаңын барлап, дайындық жасаған құрам жедел іске кірісіп, 11 сағат 57 минутта өрт сөндірілгені жайлы рапорт берді. Жалпы жүк вагонындағы енді тұтанған өрт 16 минутта сөндірілгенмен, маневр диспетчерінің хабарынан кейін 28 минут уақыт өтті.