Жамбыл өңіріндегі вокзал, станциялардағы қауіпсіздікті қамтамасыз ету үшін 494 бейнекамера қажет
Тараз қаласы бойынша меншікті тілші
Тараз станциясы желілік полиция бөлімінде Жамбыл жүк тасымалы мен магистральдық желі бөлімшелері басшыларының қатысуымен дөңгелек үстел өтті. Жиында вокзал, станция, парк, локомотивтерге бейнебақылау орнату, адам қағу мен мүліктердің ұрлануына тосқауыл қою, болат жолдың бойын қоршау сынды қауіпсіздікке қатысты жайттар талқыланды.
Желілік полиция бөлімінің басшысы, полиция полковнигі Қалжан Орынбеков сөз алып, күн тәртібіндегі мәселе бүгінгі таңда аса өзекті болып отырғанын, сондықтан бүгінгі жиында бұл бағыттағы кейбір мәселелерді шешу жолдарын табуға септігін тигізеріне үміт артатынын жеткізді. ЖПб бастығының бірінші орынбасары Аслан Дүйсенбаев баяндама жасап, бүгінгі күні теміржол қоршауларының дені ескіріп, бағаналары ұрланған, сым темірлері бүктеліп, одан адам да, мал да өтіп, пойыздардың жедел тежеуі жиі орын алып отырғанын мәліметтермен бөлісті.
– Әсіресе, мұндай оқиғалар халық тығыз орналасқан Тараз – Түлкібас телімінде жиі қайталанады. Тіпті, бүгінгі күні ұрлық көбейгендіктен біздің криминалдық полиция бөлімінің қызметкерлері тынымсыз жұмыс істеуде. Тыйым салу белгілерін қою, Тараз – Ақыртөбе, Тараз – Қаратау – Жаңатас бағытында қоршау жұмыстарын жүргізу, оны қайта жөндеу сын көтермейді. Тараз – Құмшағал арасындағы қоршаулардың бағаналары алшақ орналасқан. Мұнда пойыздар қозғалысы сағатына 90 км болу керек болса, кедергілерден жылдамдық төмендеген. Тараз станциясынан Ақыртөбеге кіреберістегі бағдаршамға дейін, Тараз станциясынан Түлкібасқа кіреберістегі бағдаршамға дейін және Тараз станциясынан Жаңатас станциясындағы теміржол тұйығына дейінгі аралық 397 шақырымды құрайды. Бүгінгі күні мұның 73,5 шақырымы қоршалған. Тараздан Ақыртөбеге кіреберістегі бағдаршамға дейінгі аралықтың бар-жоғы 16,6 шақырым ғана қоршалған. Тараз – Түлкібас арасындағы 59,9 шақырым қоршалған. Дегенмен, олқылықтар көп. Тараз – Ақыртөбе арасындағы қосымша қоршау жұмыстары жоспарға енбеген. «Жол картасына» сай келмейді. Абай даңғылы бойындағы жаяу жүргіншілер өткеліндегі тұрғындарға «ескерту белгісі» машинистің жолына қарайды, керісінше ол жаяу жүргіншілерге қарау керек, – деді полиция өкілі.
Ал Жамбыл жүк тасымалы бөлімшесінің азаматтық қорғаныс жөніндегі инженері Мұрат Бейсенбаевтың айтуынша, бүгінгі күні ЖПб-нің қызметкерлері қарайтын станцияларға 220 бейнебақылау керек. Бүгінде бейнебақылауды сатып алу, орналастыру бойынша бағасын анықтаумен орталықтандырылған жүйе айналысып жатқан көрінеді. Бұл алғашқы толқынмен алынатын камералар, жалпы Жамбыл өңірін толық қамту үшін 494 бейнекамера керек екен.
– Бұл жерде барлығы қаржы мәселесіне келіп тіреледі. Бейнекамераларды алу үшін 195 миллион теңге керек. Соңғы заңнамаларға сүйенсек, болат жолдың бойында аспалы көпір салу, жаяу жүргіншілердің өткелдерін жөндеу, белгі қою – тікелей жергілікті биліктің жұмысы. Біз бұған дейін де қала әкімдігіне хат жазған болатынбыз. Енді, осы жиынды басымдыққа ала отырып тағы да хат түсіреміз, – деді Жамбыл жүк тасымалы бөлімшесінің директоры Молдахмет Қожабеков.
Жамбыл магистральдық желі бөлімшесінің директоры Сұлтан Борамбаевтың айтуынша, қоршаулардың 70 пайызы қолды болады екен. «Оны ұрлайтындар сырттан келмейді. Жасыратын несі бар, арасында өзіміздің теміржолшылар да бар. Тараз – Құмшағал арасындағы қоршаудың тең жартысы ұрланған. Бүгінгі күні 120 шақырым қоршау қайта жасалып, бұл жұмыс 110 пайызға орындалды. Ал жалпы Жамбыл өңірінде 2300 шақырым қоршалу керек, алғашқы кезекте 750 шақырымды қоршап алуымыз керек, келесі жылға 250 шақырым жоспарланып отыр. Қоршалып жатқан аймақ – мал көп жайылатын жерлер», – деді Сұлтан Адамбайұлы.
Қыс кезінде жолаушы көп жиналатын вокзалдар мәселесі де сөз болды. Тараз, Түрксіб, Шу, Қаратау, Жаңатас вокзалдарына ЛЭД-экрандар қойып, халыққа теміржолдың қауіп-қатерін хабарлап отыру қажет. Жамбыл магистральдық желі бөлімшесі директорының вокзал шаруашылығы жөніндегі орынбасары Бейбіт Садықбеков: «Қазір бюджетте қаржы қарастырылып, келесі жылға жоспарланып отыр. Біз бұл мәселе бойынша Жамбыл облысы әкімдігі ішкі саясат басқармасына және Тараз қаласы әкімдігіне хат жазғанбыз», – деді.
Жиналғандар бірқатар мәселелер бойынша ортақ келісім қабылдады. Енді ай сайын бас қосып, келесі жиынға қала әкімінің орынбасары мен Жамбыл облысы әкімдігі жолаушылар тасымалы және автомобиль жолдары басқармасының өкілдерін шақыратын болды.