Жол бойындағы келеңсіз жайттар екі есе төмендеген
Қызылорда облысы бойынша меншікті тілші
Қызылорда магистральдық желі бөлімшесі бойынша жыл басынан бергі уақыт аралығында пойыздардың қозғалыс қауіпсіздігінің бұзылуына, апат және тосын оқиғалардың тіркелуіне жолберілген жоқ. Аймақ теміржолшылары КТСМ құрылғысымен 308432 жылжымалы құрамды бақылаудан өткізген.
Жылжымалы құрамдағы жүк вагондарының жағдайын бақылайтын УКСПС, КГУ, КЛУБ құрылғыларының жұмыстан тыс қалу жағдайлары тіркелмеген. Дегенмен жол құрылғыларының істен шығуы, рельс үстіне бөгде заттың қойылуы жағдайлары орын алған. Жол жағалай жүретін бөгде адамдардың, малдың жолға шығып кету кінәсінен тепловоз машинистерінің жедел тежегіш қолдануы биыл 61 рет тіркелсе, өткен жылдың есепті мерзімінде 136 мәрте тіркеліпті. Келеңсіз жайттардың екі еседен көп төмендеуі – жағымды көрсеткіш. Бөлімшенің қозғалыс қауіпсіздігі бөлімінің басшысы Бақытбек Сәрсенов қозғалыс қауіпсіздігін сақтау – ең басты міндет, сондықтан осы бағытта іс-шаралар тұрақты жүргізіліп жатқанын айтады.
– Жыл басынан бері осы уақытқа дейін қауіпсіздік шаралары қатаң сақталып келеді. Пойыздардың қозғалыс қауіпсіздігін сақтауды арттыру үшін Қызылорда, Сексеуіл және Қазалы жол дистанцияларының басшыларына күнделікті атқарып жүрген жұмыстарына қосымша тапсырмалар жүктелді. Яғни, станция, бекет және жол бойына жақын маңдағы елдімекен тұрғындарымен кездесіп, теміржолдың аса қауіпті аймақ екендігін түсіндіру, рельс үстіне бөгде зат қою, жол бойы нысандарын жымқыру және зиян келтіру қылмыс екенін, тиісінше, жазасы да ауыр болатынын түсіндіру шаралары міндеттелді. Сонымен қатар рельс тізбектеріндегі кемшіліктерді орнына келтіруде орта буын басшылықтың жауапкершілігі арттыруға, жол тексеру құрылғылары ПС, МДК-мен анықталған кемшіліктердің сапалы орындалуын бақылап тексеруге басымдық берілмек. Осы сияқты басқа да жұмыстар қозғалыс қауіпсіздігінің бұзылуына жол бермей, жылды жақсы дәрежемен аяқтауға мүмкіндік береді деген ойдамыз, – дейді қозғалыс қауіпсіздігіне жауапты маман.
Сонымен қатар дистанциялардың жұмыскерлеріне және орта буын басшыларына рельс тізбектерінің жағдайын ай сайын тексеру, техникалық, теориялық тәжірибені шыңдау мақсатында теміржолшылармен өткізілетін техникалық сабақтардың сапасын жетілдіру, құрылғылар мен саймандардың уақытынан бұрын жарамсыз халге түспеуі үшін дер кезінде бабына келтіру, КИП жұмысын бақылау, құрылғылардың уақытылы алмастырылуына бақылау жасау секілді жауапты жұмыстар тапсырылған. Иесіз малдың жол бойына жайылуын тоқтату, бөгде адамдардың жол жағалай бейсауыт жүруін азайту мақсатында өңір бойынша жергілікті тұрғындармен 257 рет кездесу өтіп, профилактикалық шаралар жүргізілген.