ҚТЖ-да өндірістік жарақат алу 40%-ға төмендеген

Қазақстан теміржолында былтыр 2021 жылмен салыстырғанда өндірістік жарақат алу дерегі 40 пайызға төмендеп, жұмысқа уақытша жарамсыздық деңгейі 20 пайыз азайды. Қайғылы жағдайлар салдарынан мүгедек болып қалу фактісі алдыңғы жылы 7 рет болса, өткен жылы мүлде тіркелмеді.

Бұған соңғы үш жылдан бері компанияда жүргізіліп жатқан жүйелі ірі жобалардың арқасында қол жетіп отыр. Темір жолдағы қауіпсіз еңбек жағдайы, жарақат алуды болдырмау, т.б. мәселелер туралы «ҚТЖ» ҰК» АҚ бас инженері Батыр Котырев «Магистраль» сарапшылық форумында берген сұхбатында айтты.  

– Өткен жыл «Самұрық Қазына» АҚ портфелді компаниялары арасында «Жарақат алуға жол бермеу жылы» болып жарияланды. 2019 жылы біздің компания Бүкіләлемдік Zero vision тұжырымдамасына қосылды. Осы аралықта көптеген шаруа тындырылды. Басты мақсат – нөлдік жарақат алу деңгейіне жету. Соған қол жеткізу үшін алдымызға міндет қойдық, теміржолшылардың қауіпсіздік мәдениеті деңгейін көтеруге кірістік. Әрине адам өліміне әкелетін қайғылы жағдайларды толық жоя алмадық, дегенмен 2021 жылы 12 адам өндірісте көз жұмса, былтыр 5 адам қайтыс болды. Осы ретте айтарым – еңбек қауіпсіздігін қамтамасыз етуге екі жақтың да жауапкершілігі керек. Алдымен жұмыс беруші тарапынан, екіншіден жұмысшы тарапынан. Екі тарап та заңда, салалық стандарттарда жазылған талаптарды орындауы тиіс, – деді бас инженер.  

Сонымен қатар 3 жылдан бері енгізілген «Өндірістік қауіпсіздіктің біріктірілген жүйесі» платформасы да өз нәтижесін беруде екен. Оның аудиториясы – теміржолшылар, барлық деңгейдегі басшылар. 2023 жылы осы платформаға өзге серіктестерді де біріктіру көзделуде. Осы жоба арқылы басшылықтың рұқсатымен әрбір қызметкерге қауіпті жұмысты тоқтатуға құқық берілген. Егер белгілі бір жағдай оның өмірі мен денсаулығына қауіп төндірсе, жұмысын тоқтата алады. Бұл ретте жұмысшы аталған платформа қосымшасы жүктелген өзінің ұялы телефоны арқылы немесе диспетчер арқылы стационарлық компьютерде осы жағдайды тіркейді. Аталған платформаға компанияның 100 мыңнан астам қызметкері тіркелген.  

– Осылайша жұмысшы өз өмірі мен денсаулығын сақтап қалады. Бұл ретте жұмыс беруші жұмысшыны қудаламауға, тергеуге алмауға, жазаламауға кепілдік береді. Керісінше сол үшін марапаттаймыз. Осымен үшінші жыл компанияда ішкі конкурс өткізудеміз. Қауіпсіздіктің іс-қимыл диалогы әрбір қызметкердің қауіпті еңбек жағдайын анықтап, соны платформада тіркеуіне құқық береді. Ай сайын жеңімпаздар анықталып отырады. Оларға 20 АЕК дейін сыйақы төленеді. Жыл соңында барлық турдан өткен жеңімпазға ең үлкен премия – 3 млн теңге беріледі, – дейді Б.Котырев.