Теміржол бойында кезекті рейд өтті
Қызылорда облысы бойынша меншікті тілші
«Әскерилендірілген темір жол күзеті» ЖШС Түркістан филиалына қарасты Қызылорда күзетінің сарбаздары желілік полициямен бірлесіп кезекті рейдке шықты.
Жыл басынан бері пойыздардың қозғалыс қауіпсіздігін арттыруды көздеген акцияларға белсене атсалысып келе жатқан күзет сарбаздары әсіресе ұрлық-қарлықтың алдын алуда бірталай жетістікке жетті. Қызылорда шұғыл әрекетті оңтайландыру тобының тікелей іс-әрекеті арқасында ағымдағы жылдың ақпан-наурыз айлары аралығында «Тұрмыстық мақсаттағы көмірді тасымалдауға қабылдау кезіндегі тиеуді сапалы тексеру және тасымалдарды сақтаудың маңызды шарттары» тақырыбында айлық жарияланып, Қызылорда қосалқы бөлімі, ЖІІб және ӘТЖК мекемелері арасында комиссия құрылып, бірлескен іс-жоспар жасалды. Жоспар бойынша барлық шаралар іске асырылып, аймақ бекеттеріне түсіріліп, таратылған көмір отынының талан-таражға түсуіне, қол сұғу фактілерінің орын алуына жол берілген жоқ.
– Сонымен қатар «Темір жол – қауіпті аймақ» тақырыбындағы желілік полиция бөлімімен бірлесіп теміржолға жақын орналасқан мектептерді, оқу орындарын аралап, түсіндіру жұмыстарын тұрақты жүргізіп келеміз, – дейді Қызылорда шұғыл әрекетті оңтайландыру тобының мүшесі Жандос Тарманов.
Негізінен жүк пойыздарына белгіленген нүктеге дейін жеткізу мен жол бойы нысандарын күзету қызметін атқаратын әскерилендірілген күзет сарбаздары қауіпсіздікті сақтау шараларына да осылай өз үлестерін қосуда.
