ҚТЖ-ның қауіпсіздік деңгейі 59% құрады
«Қазақстан теміржолшысы» газетінің тілшісі
Былтыр қараша айында «Қазақстан темір жолы» ҰК»АҚ қызметкерлері арасында қауіпсіздікті, денсаулықты және жұмыс орнындағы еңбек жағдайын анықтау мақсатында арнайы сауалнама жүргізілген.
Сауалнамаға әдістеме ретінде VISION ZERO командасының әлемнің көптеген ұйымдарымен және сарапшыларымен кеңесу кезінде әзірлеген жұмыс орнындағы қауіпсіздікті, денсаулықты және әл-ауқатты өлшеуге арналған нұсқаулығы қолданылған. VZ нұсқаулығында қарастырылған шкала бойынша деректерді өңдегеннен кейін ҚТЖ-ның қауіпсіздік, денсаулық және әл-ауқаттық орташа деңгейі 59% құраған. Аталған нұсқаулыққа сәйкес Компания Прогресс деңгейін көрсеткен. Бұл дегеніміз – жақсартуға бағытталған жүйелі белсенді қозғалыс. Ал биылғы жылы, яғни өткен наурыз айында жүргізілген сауалнама бұл нәтижені растай түскен. Сондай-ақ, өткен жылдың соңында Компания инспекциялық аудиттен өткен. Жүргізілген аудит барысында қаралған құжаттар мен аудиттелген процестер негізінде менеджмент жүйесі толық көлемде нәтижелі деп табылған.
«Менеджмент жүйесі қолданыстағы талаптарды орындауға және күтілетін нәтижелерді қамтамасыз етуге қабілетті екенін көрсетті. Бұдан түйетініміз, жарақаттануға жол бермей жұмыс істеуге бізде қажетті әлеуеттің бәрі бар. Жақында өндірістік қауіпсіздікке қатысты форумда соңғы 7, 10 және 15 жылда бірде-бір жарақаттану оқиғасына жол бермеген 21 құрылымдық бөлімше марапатталды. Компанияның басқа да шаруашылықтар мен еншілес ұйымдары, құрылымдық бөлімшелері солардың қатарында болуға барын салу керек. Ол үшін қауіпті жұмыс жағдайларын тоқтатып, ҚТЖ енгізіп жатқан заманауи технологияларды белсенді қолдану керек», – дейді бұл туралы ой бөліскен Компанияның бас инженері Батыр Котырев.