Қызмет барысында опат болған теміржолшылардың рухына дұға бағышталды
Маңғыстау облысы бойынша меншікті тілші
Дүниежүзілік еңбекті қорғау күніне орай бейнеулік теміржолшылар өндірістік жарақат алып, дүниеден өткен әріптесінің үйіне барды. Отбасының хал-жағдайымен танысып, атаулы күнде жанұясының көңіл-күйін көтеріп қайтты.
Бейнеу станциясының бастығы Есет Хайруллин мен цехтық кәсіподақ ұйымының төрағасы Ұлдай Жұмаханова бастаған теміржолшылар кезінде осы станцияда пойыз құрастырушы болып еңбек еткен Қамбар Берденовтың шаңырағында болды. Бүгінде арамызда жоқ марқұм әріптесінің рухына дұға бағыштап, аз да болса балаларына атаған сый-сияпатын табыстады.
Жалпы, Бейнеу станциясы бұл күнге орай бірнеше іс-шараның ұйытқысы болды. Станция бастығының төрағалығымен жиналыс өтіп, басқосуға елу шақты теміржолшы қатысты. «Ең үздік санитарлық тамақтану бөлмесі» аталымы бойынша байқау ұйымдастырылып, үздік деп танылған бөлмені баптап отырған қызметкерлер кәсіподақ ұйымының атынан сыйлыққа ие болды.
– Еңбекті қорғау күнін атап өтуге балапандарымыз да атсалысты. Олар еңбекті қорғау тақырыбына «Есіңде болсын, олар сені үйде күтеді!», «Ата – анам қауіпсіз жұмыс жасайды» атты балалар сурет байқауына қатысып, өз қиялы шеңберінде қауіпсіздіктің сақталуына тамшыдай болса да үлесін қосты. Еңбектерін көріп ата-аналар да риза, сыйлықтарын алып балақайлар да қуанышты, – дейді Бейнеу станциясының еңбек қорғау инженері Гүлшара Мұхтарова.