Бейнеу станциясында шұғыл тежеу 8 рет қолданылған

Бейнеу станциясында теміржол көлігі обьектілерінде адамдардың жарақаттануының және құқықбұзушылықтардың алдын алуға арналған жиын өтті. Кездесуге станция қызметкерлерімен қатар барлық теміржол бөлімшелерінің өкілдері, желілік полицейлер және әскери күзетшілер де қатысты.  

Бейнеу станциясының бастығы  Есет Хайруллин мен Бейнеу ст. ЖПб бастығы полиция майоры Насыр Дербісалиев көліктегі полиция департаменті мен «ҚТЖ» ҰҚ» АҚ-ның 2022-2023 жылдарға арналған темір жолдағы мүліктің қауіпсіздігі мен сақталуы деңгейін арттыру жөніндегі Жол картасы жобасын іске асыру барысына тоқталды. Екі тарап пойыздар қозғалысы мен қауіпсіздігін жақсарту,  темір жол көлігіндегі құқықтық тәртіпті қамтамасыз ету саласындағы мәселелерді талқылады. Сонымен қатар темір жолдар арқылы өту, сондай-ақ темір жол маңында мал жаю ережелерін бұзушыларға жауапкершілік қарастырылатыны ескертілді. Мамандардың айтуынша, төтенше жағдайлар мен қайғылы оқиғалар көбіне бейқамдықтан, заң талаптарын біле бермейтіндіктен туындайды.  

– Бейнеу станциясының желілік тәртіп сақшыларының қызмет көрсету аумағы – 643 км құрайды. Сол аумақта жыл басынан бері локомотивтер мал қағу бойынша 8 рет оқыс тежеу берген. Соның төртеуі бойынша мал иелері анықталып, айыппұл салынды. Қалғаны белгісіз. Аса ауыр қылмыстар тіркелген жоқ, дегенмен қауіп-қатер аяқ астында екенін тағы ескертеміз. Ос аралықта заң бұзған жалпы азаматтар бойынша әкімшілік жауапкершілік арқалағандар аз емес.  Ішімдік ішіп, теміржолды белгіленбеген жерден немесе пойыз астынан өтіп, қоқыс тастағаны үшін және басқа да тәртіп бұзушылықтар бойынша 287 адам жауапқа тартылды, – дейді Н.Дербісалиев.  

Станция бастығы  Есет Хайруллин теміржолда жүріп-тұру ережелерін еске  салып,  профилактикалық ақпараттармен бөлісіп отырудың өзектілігіне тоқталды. Мұндай жағдайда жауапкершілік деңгейі, сонымен қатар теміржол бойында санитарлық тазалықты сақтау нормаларын сөз етті.