Болашақ теміржолында күзгі байқау басталды

Әне-міне дегенше қыстың аязды күндері де жақындап қалды. Сондықтан күздің алғашқы айы кірісімен қыс қамына қарекетті пысықтайтын тексерістер мен жұмыстар қыза түскен. Маңғыстау теміржолындағы күзгі комиссиялық байқау әдеттегідей Болашақ теміржолынан басталды.

Болашақ-Өзен бағытындағы теміржол нысандарын аралауға Маңғыстау станциясынан 11 қыркүйек күні кешке қарай комиссия мүшелері мінген пойыз жолға шықты. Күзгі байқауды жүргізетін комиссия құрамына елу шақты адам бекітілген. Комиссияға Маңғыстау қосалқы бөлімі бастығы Нәжімеден Ғұбашов төрағалық етуде. Тексерушілер құрамында қосалқы бөлім мен Маңғыстау магистральдық желі бөлімшесінің басшылығы, бөлім, сектор меңгерушілері, ревизорлар, кәсіподақ ұйымы өкілдері бар.  

Аталған комиссия белгіленген жоспар бойынша 12 қыркүйек таңертең Болашақ станциясында орналасқан теміржол нысандарындағы күзгі тексеріс жұмысына кірісті. Жұмыс орындарының жай-күйі, жолдар мен ғимараттар жағдайы, жұмысшылардың еңбек етуіне қолайлы мүмкіндіктер, олардың қажетті құрал-саймандармен қамтылуы сияқты мәселелер егжей-тегжейлі тексерілді.  

– Қосалқы бөлім бастығы төрағалық еткен комиссия станциямыздағы бірнеше мекемені аралап, әр маман өз бағыты бойынша тексерістер жүргізді. Жылдағыдай қажетті мәселелер қаралып, қысқа дайындықтарымыз пысықталды. Біздегі бір мәселе, бірнеше мекеме орналасқан «АБК» ғимаратының төбесінен су өтетін еді. Биыл сол жөнделіп жатыр. Жөндеу жұмыстарымен «Теміржолсу» мекемесі айналысуда. Жұмыстарын қыс басталғанға дейін, бір айдың көлемінде бітіреміз деп отыр. Сондай-ақ техникалық қызмет көрсету пункті, вокзал, әскерилендірілген теміржол күзеті, жол, электрмен жабдықтау дистанциялары сияқты мекемелердің ғимараттарына жылу беретін №58 қазандықтың толық жүйесі жаңартылуда. Құбырлары түгелдей ауыстырылып жатыр. Болашақ ашылғалы қызмет көрсетіп тұрған құбырлар ескіріп, қыста әр жерінен жарылып, қиындық туғызатын. Сол проблемадан енді құтылатын боламыз. Жылу беру мерзіміне дейін жүйе жаңарып, толықтай іске қосылады деп күтілуде, – дейді Болашақ станциясының бастығы Мақсат Нұрбеков.  

Болашақтан кейін комиссия мүшелері бағытты Өзен станциясына қарай өзгертті. Демалыс күніне дейін Бестөрткүл, Құрмаш, Тайғыр, Бопай, Ақбөбек, Бастау, Жетібай, Қарақия, Боржақты, «Р», Ерсай, Құрық порты станциялары мен бекеттерінде болып, белгіленген мақсатқа сай жұмыстарын жалғастырды.