Былтыр Жамбыл облысында 700-дей теміржолшының конституциялық құқығы қорғалды
"Қазақстан теміржолшысы" газетінің Жамбыл облысындағы меншікті тілшісі
Теміржолшылардың еңбек қауіпсіздігінің сақталуы, жалпы конституциялық құқығының қорғалуы көлік прокуратурасының назарынан тыс қалмайды. Жамбыл көлік прокуратурасының мәліметінше, былтыр қадағалау қызметі 700-дей теміржолшының конституциялық құқықтарын қорғап, тиісті шешімдер қабылдаған.
Олардың дені – әлеуметтік, құқықтық тұрғыда туындайтын мәселелер бойынша жұмысшылардың өтініш-тілектеріне қатысты жайттар.
«Былтыр желтоқсан айына дейін «ҚТЖ» ҰК» АҚ «Жамбыл магистральдық желі бөлімшесі» және «ҚТЖ-Жүк тасымалы» ЖШС Жамбыл жүк тасымалы бөлімшесі филиалдарының 11 лауазымды тұлғасына ҚР Әкімшілік құқық бұзушылық туралы Кодекстің 972-бабының 3-бөлігіне сәйкес 400 айлық есептік көрсеткіш мөлшерінде айыппұл салынып, тәртіптік жауапкершілікке тартылды», – дейді Жамбыл көлік прокуроры Аслан Әбілдаев.
Қадағалау қызметі өткен жылы теміржол көлігіндегі қозғалыс қауіпсіздігі саласында бірқатар бұзушылықтарды анықтаған. Оның ішінде тепловоздарды сапасыз жөндеу, электровоздарға техникалық және сервистік қызмет көрсету секілді кемшіліктерге жол берілген.
Сондай-ақ жоспарлы-алдын алу жөндеуінен өтпеген 26 локомотивті пайдалану фактісі тіркелген. Көлік прокурорының сөзіне сүйенсек, қосалқы бөлшектермен және материалдармен жеткіліксіз жарақтандыру, темір жолдарды сапасыз ұстау сынды олқылықтар да орын алған. Соған байланысты үш қадағалау актісі енгізіліпті. Бес жауапты тұлға тәртіптік, тағы үшеуі әкімшілік құқық бұзушылық туралы кодекстің 559-бабының 6-бөлігіне сай әкімшілік жауапкершілікке тартылған.