Тараз станциясында қауіпсіздік аптасы өтті
"Қазақстан теміржолшысы" газетінің Жамбыл облысындағы меншікті тілшісі
Тараз станциясындағы Желілік полиция бөлімінің қызмет көрсету учаскесінде 5 күндік «Көліктегі қауіпсіздік» акциясы өтті.
Желілік полиция бөлімінің қызметкерлері жолаушыларға қауіпсіздік ережелері жазылған парақшалар таратып, түсіндіру жұмыстарын жүргізді. Сондай-ақ акция барысында дөңгелек үстел отырысы ұйымдастырылып, Тараз станциясы Желілік полиция бөлімінің бірінші орынбасары, полиция капитаны Р.Заппаров, Әкімшілік полиция бөлімінің аға инспекторы, полиция майоры Л.Көпбаева мен «ҚТЖ ҰК» АҚ Әскерилендірілген теміржол күзеті Тараз филиалы директоры Е.Мүсілімов көліктегі қауіпсіздікті сақтау бағытында атқарылып жатқан жұмыстар туралы баяндады.
Мамандар Тараз станциясының қызмет көрсету учаскесінде пойыздардың адам басып кету фактілерінің алдын алу үшін тұрғындарға, әсіресе жас жеткіншектерге теміржолдағы қауіпсіз жүріс-тұрыс ережелерін ескерту маңызды екенін атап өтті.
Қараусыз, қадағалаусыз қалған баланың бұзақылық жасап, келеңсіз жағдайға тап болуы мүмкін екені ескертілді. Себебі жазатайым оқиғалар бойынша жүргізілген талдау-сараптама жұмыстарының нәтижесі осыны көрсеткен.