Шымкент станциясында жол қауіпсіздігі талқыланды
Көліктегі полиция департаментінің ұйымдастыруымен Шымкент станциясында өткен жиынға аймақтағы барлық теміржол мекемелерінің басшылығы арнайы шақырылды.
Жиында жол картасы талаптардың орындалуы сөз болып, теміржолдағы қозғалыс қауіпсіздігін қамтамасыз ету талаптары, жол бойында мал жаю қағидаларын сақтау, жергілікті әкімдіктермен жұмыс, осы бағытта қолға алынатын іс-шаралар легі талқыға салынды.
Шымкент станциясындағы желілік полиция бөлімінің бастығы, полиция подполковнигі Нұрлан Қошқарбековтің айтуынша, темір жолға жақын елді мекендердің төрт түлігі қозғалыс қауіпсіздігіне айтарлықтай кедергі келтіріп отырғаны ешкімге жасырын емес. Сондықтан желілік полиция теміржолшылармен бірге әрекет етіп, теміржол аумағының қауіпсіздігін қамтамасыз етіп, кез келген құқықбұзушылықтың жолын кесуге әрекет етуі тиіс.
Жиынның күн тәртібінде қарастырылған «Теміржол – қауіпті аумақ», «Теміржол торабында мал жаю ережелері», «Теміржол өткелдері арқылы автокөліктердің өту ережелері», «Әкімшілік жауапкершілікке тарту» мәселелері бойынша алдағы уақытта атқарылатын жұмыс жоспары мақұлданды.
Әуезхан БАЙНБЕТОВ, Шымкент