Жамбыл өңірінде жыл басынан бері малды пойыз басып кетудің 13 фактісі тіркелді
"Қазақстан теміржолшысы" газетінің Жамбыл облысындағы меншікті тілшісі
Жыл басынан бері өткен небәрі 20 күннің ішінде Жамбыл өңірінде ірі қара және ұсақ малды пойыз басып кетудің 13 фактісі тіркеліп отыр. Орын алған жағдай төрт түлік иелерін ғана шығынға батырған жоқ...
Келеңсіз оқиғалардың салдарынан локомотивтер бүлініп, пойыздардың кешігуі орын алды. Қазіргі кезде тиісті органдар орын алған жағдайларға байланысты талдау жүргізіп, жиналған материалдар ҚТЖ өкілдеріне жіберілді.
Мамандардың айтуынша, пойыздардың мал басу жағдайларының басым көпшілігі кешкі алакөбең шақта немесе таңертеңгілік уақыттарда болған. Қараусыз малдың қары аршылған жол бойын жағалай жайылатыны түсінікті.
– Машинистер малды басып кетпеу үшін шұғыл тежегішті басып, жылдамдықпен келе жатқан пойызды тоқтатуға тырысады. Ал бұл жағдайда басқа да техникалық қауіпсіздік ережелерін сақтауға мүмкіндік болмай жатады. Мал иелерінің өзіне келер шығын тағы бар, айыппұл төлегеннен бөлек ақ-адал өсірген малынан кім айрылғысы келеді дейсің. Ендеше, шығасыға иесі басшы, халық төрт түлігіне ие болса, екі жаққа да қып-қызыл шығын мұндай келеңсіз оқиғалар азазяр еді, – дейді Тараз станциясындағы желілік полиция бөлімі бастығының бірінші орынбасары, полиция капитаны Р.Заппаров.
Орын алған 13 жағдайға байланысты 100 адам әкімшілік жауапкершілікке тартылуда. Локомотивтердің бүлінуі мен пойыздардың кешігуіне байланысты залал сомасын өндіріп алу үшін сотқа материалдар дайындауда. Теміржолшылар тұрғындардан төрт түлікті әкімдіктер бөлген арнайы жайылымдарға ғана жаюды сұрайды.