Атырауда көктемгі байқау жүріп жатыр

Атырау жүк тасымалы бөлімшесінде көктемгі комиссиялық байқау басталды. Өңірдегі су тасқынына байланысты межеленген уақыттан кеш басталғаны да рас. Комиссиялық тексеру басшылық құрам мен тиісті мамандармен қамтылған үш вагон арқылы жүзеге асырылуда.  

Биылғы көктемгі тексеру жұмыстары көп бөлігі суға кеткен Құлсары қаласындағы Құлсары станциясынан басталды. Қаладағы су басқан аймақтың тіршілігі қалпына келтіріліп жатыр. Су айдау, көп жерде дезинфекциялау жұмыстары жасалуда. Кей жерлерде бөгеттер әлі де тұрғызылып, су қайтқан тұстарда алынып жатыр. Үйлеріне біртіндеп оралып жатқандары да бар...  

– Комиссия құрамында Атырау жүк тасымалы және магистральдық желі бөлімшесінің құрылымдық бөлімдер мамандары мен ревизорлық топ жұмыстарын алдымен 496-402 разъезд аралығы, Мақат-Құлсары, Сағыз-Мақат телімдерінен бастады, әрі қарай Теңдік және Ақжайық станциялары, Ганюшкино-Д.Нұрпейсова теліміне ойысады. Ганюшкино-Исатай, Исатай-Қызылжар телімдердегі жол, сигнализация, энергиямен қамту дистанциялары, вагон, локомотив деполары, т.б. қаралады. Содан кейін Махамбет, Атырау станцияларына тоқтап, сол жерлерде талқылау жұмыстары жүргізіледі, – дейді Атырау жүк тасымалы бөлімшесінің техникалық бөлім бастығы Әзиз Айжарықов.  

Атырау жүк тасымалы бөлімшесінің бастығы Аслан Базарғалиев Құлсары станциясында жергілікті жұмысшылардың жағдайымен танысты. Құлсары аймағы бойынша 49 теміржолшының үйі суға кеткен екен. Оларға бөлімше тарапынан тиісті көмектің барлығы берілетінін мәлімдеді. Бүгінде үйі суға кеткен теміржолшыларға 100 АЕК көлемінде біржолғы көмек берілген. Сондай-ақ бөлімше кәсіподағы тарапынан ең төменгі жалақы мөлшерінде (85 мың) көмек көрсетіпті. Сонымен қатар барлық өңірде теміржолшылар орталық кәсіподаққа зардап шеккендерге бір күндік жалақыны аудару туралы ұсыныс берген. Үйлері суға кеткен станция жұмысшылары болған жайтқа түсіністікпен қарап отыр.

Жиын барысында арнайы киім туралы сөз болды. Техникалық орталық маманы Ақмарал Елеусінованың айтуынша, операторларға берілген арнайы киім сапасы нашар, түсі қап-қара ауа өткізбейтін қалың синтетикадан тігілген. Оны жаздыгүні кию мүмкін емес. Сол секілді аяқ киім мөлшерлері де сәйкес келе бермейді.  

Комиссия мүшелерінің әрқайсысы өз салалары бойынша нысандарды аралап, тексеріс жүргізді. Жалпы, биылғы жылдың үш айында пойыз және маневрлік жұмыстарда өңірде өндірістік жарақат алу болмаған. Бөлімшеде пайдаланым көрсеткіштерін орындау бойынша нәтижелер жақсы деңгейде келе жатыр. Тексеріс кезінде станциялардың техникалық жағдайы, магистральдық инфрақұрылым мен жасанды құрылғылардың жай-күйі, су мен жылу нысандары, өрт қауіпсіздігін сақтау ережелері, құжаттама толтыру, еңбек қорғау мен еңбек орындары қаралды. Құлсары басындағы ЭЧ, ВЧД, ПЧ, ШЧ, ТЧЭ мекемесі және машинистердің демалыс орындары, Құлсары вокзалы да комиссия назарынан тыс қалған жоқ. Барлық станция-бекеттердегі тексеру барысында шаблон арқылы жол параметрлерінің талапқа сәйкестілігі, нормативтік, техникалық құжаттамалардың дұрыс толтырылуы, вагон шаруашылығы, байланыс және электр жабдықтардың, бағыттамалы бұрмалардың жарамдылығы, станциялардың техникалық жағдайы, магистральдық инфрақұрылым мен жасанды құрылғылардың, астынан су өтетін теміржол көпірлерінің жағдайы да қаралды. Бүгінгі күні комиссия Мақат-Сағыз аралығындағы нысандарда тексеру жұмыстарын жүргізуге кіріскен.