Жамбылдық теміржолшылар рейд өткізді

Жамбылдық теміржолшылар мен желілік полиция қызметкерлері өндірістік емес жарақаттанудың алдын алу бойынша бірлескен рейд өткізді. Таңертең Тараз станциясынан басталған рейдтік іс-шара бірнеше орында жалғасты.

Тараз станциясында транзиттік, қабылдап-жөнелту, жолаушылар және сұрыптау парктері бар. Жамбыл ЖТ бөлімшесінің бас инженері Дүйсенбек Сыдықовтың айтуынша, парктер күндіз-түні жолаушы және жүк пойыздарын қабылдап алып, тиісті қызметін көрсетіп, әрі қарай жөнелтіп жатады. Бір сөзбен айтқанда, пойыздар қозғалысы үздіксіз.

– Міне, дәл осы жер – парктердің арасын жалғап жатқан станцияның өзегі. Шаһардың Байзақ батыр көшесінің бойында орналасқан Тараз станциясында қызметкерлерге арналған теміржолды кесіп өтетін өткел бар. Талап бойынша бұл жерден тұрғындарға өтуге болмайды. Бүгін біз осында желілік полиция бөлімшесінің қызметкерлерімен бірге рейд өткізіп, тұрғындарға ескерту жасап, түсіндіру жұмыстарын жүргіздік. Басты мақсат – жазатайым оқиғалардың алдын алу. Жалпы Жамбыл бөлімшесі ай сайын осындай іс-шараларды өткізіп тұрады. Ал бірлескен жұмыстар әр тоқсанда бір рет ұйымдастырылады, – дейді Дүйсенбек Сыдықов.  

«Жаяу жүргіншілерге өтуге болмайды» деп тыйым салынғанымен, теміржолдың арғы және бергі бетіндегі тараздықтар әріректегі өтуге рұқсат берілген өткелден айналып жүргісі келмей, осы тұстан кесіп өтеді. Әсіресе ертеңгі, түскі, кешкі уақыттарда жаяу жүргіншілер қарасы көп.

Тараз станциясының бас инженері Ерсін Шардарбековтің айтуынша, осындай «час пик» кезінде екі жақта да пойыздардың өтіп біткенін күтіп, әжептеуір адам жиналып қалады екен. «Кей кездерде тура өткелге келіп тоқтап тұрып қалған пойыздың қайта жүріп, өтіп кеткенін күткісі келмеген тұрғындар вагондардың астынан өтеді. Бұл енді өте қауіпті. Теміржолдың қауіпті аймақ екенін естен шығармаған жөн», – дейді ол. Тараз станциясындағы желілік полиция бөлімі бастығының орынбасары, полиция майоры Мақсат Дүйсембиевтің сөзіне сүйенсек, бүгінге дейін теміржолдан белгіленбеген жерден өткені үшін Әкімшілік Кодекстің 559-бабының 5-бөліміне сәйкес 1308 тұлға, ал осы баптың 1-бөлімінде көрсетілген талапқа сай теміржол бойында мал жайғаны үшін 81 азамат әкімшілік жауапкершілікке тартылған.  

– Өкінішке қарай, тіркелген оқиғалардың біреуі қайғылы жағдаймен аяқталды. Екі адам ауыр жарақаттанып, ауруханаға түсті. Тұрғындардың ескертулер мен түсіндірулерге қарамастан жолды кесіп өтуінің кесірінен пойыздарды шұғыл тоқтатудың 54 дерегі тіркелді, – деді майор.  

Желілік полиция бөлімінің әкімшілік полиция бөлімшесінің бастығы, полиция аға лейтенанты Сералы Кембаев рейд барысында бір сағаттың ішінде теміржолды белгіленбеген жерден кесіп өткен 15-ке жуық тұрғынға жазбаша ескерту берілгенін жеткізді. «Полиция қызметкерлері азаматтардың жеке құжаттары бойынша электронды түрде ескерту парағын толтырды. Ескерту парағына жаяу жүргіншілер қол қоюуы тиіс. Алайда, өз қауіпсіздігі үшін жасалып жатқан шараға қарсылық көрсетіп, дау тудырғандар да болды», – дейді Сералы Ералыұлы.  

Жалпы қауіпті учаскелерде машинистер жылдамдықты төмендетіп, жолға аса сақ қарайды. Дегенмен пойыздың тежеу қашықтығынан бөлек вагондардың салмағы, пойыздың екпіні бар, қайғылы жағдайдың алдын алу мүмкін болмай қалатын кездер де кездеседі.  

Рейдке қатысушылар тұрғындарға теміржолдан өткен кезде есте сақтауы тиіс ережелерді түсіндірді. Арнайы буклеттер мен жадынамалар таратты.