Шу станциясында 21 жылдан бері жарақаттану жағдайы тіркелмеген
"Қазақстан теміржолшысы" газетінің Жамбыл облысындағы меншікті тілшісі
Шу станциясында өндіріс жағдайында оқыс оқиға, жарақаттану жағдайы тіркелмегелі 21 жыл уақыт өткен. Бұл жыл айрығындағы 12 айда атқарылған жұмыстарды қорытындылап, есебін беріп, келер жылды жоспарлайтын кезең еді. Орын алған оқиға станция теміржолшыларына үлкен сабақ болды...
Содан бері 7 жарым мыңнан астам күн өтті. Осы уақыт аралығында станция қызметкерлері ондай келеңсіздікке жол бермеу үшін күресіп келеді. Яғни өндіріс қырағылық пен сақтыққа құрылған, әрбір теміржолшы шалыс басқан қадам үшін қандай жауапкершілік пен ауыртпалық жүктелетінін жақсы біледі.
– Бұл тек қағаздағы жақсы көрсеткіш, ал адам – ең маңызды фактор. Теміржолшылардың еңбек қауіпсіздігін сақтау – әрдайым бірінші орында тұратын мәселе. Біз теміржолдың жоғары қауіпті аймақ және адамның өмірі ең қымбат екенін ешуақытта естен шығарған емеспіз. Және әрбір қызметкерден ақырын жүріп, анық басып, қауіпсіз еңбек қағидаларын сақтауды талап етеміз. Жазатайым жағдайлардың алдын алу үшін барлық нұсқамаларды орындап, талаптарды сақтап, жұмыс жүргіземіз. Сонымен қатар өндірісте оқыс оқиға, жазатайым жағдайлардың алдын алу, еңбек талаптарын сақтау мақсатында теориялық және практикалық оқу курстары өткізіліп тұрады, – дейді Шу станциясының бастығы Саят Құсаинов.
Өндірісте жарақаттануға жол бермей, ұзақ жыл оқыс оқиға, апатсыз жұмыс істеп, жақсы көрсеткіштерге жеткен Шу станциясына 2019 жылы «Қазақстан темір жолы» ҰК» АҚ бас инженерінің №062 еңбек қауіпсіздігі және еңбекті қорғау саласындағы Сенім сертификатына ие болған.
Ал жақында «ҚТЖ-Жүк тасымалы» ЖШС филиалы Жамбыл жүк тасымалы бөлімшесіндегі еңбек қауіпсіздігі тақырыбында өткен семинарда жазатайым оқиғасыз жұмыс істеген мекемелер анықталып, осындай еңбек тәжірибесі қалыптасқан Шу станциясы филиал директорының Алғыс хатымен марапатталды. Шу – тәулігіне 2210 вагонды қайта өңдеу қабілеті бар кластан тыс станция. Онда штат бойынша бүгінгі таңда 193 теміржолшы еңбек етеді.
