Ақтөбеде өртке қарсы оқу-жаттығуы өтті

Ақтөбе магистральдық желі бөлімшесі азаматтық қорғаныс қызметкерлерімен бірге өрт-тактикалық оқу-жаттығу өткізді. Алға ауданы Бестамақ станциясында өткен шара құрылымдардың бірлескен жұмысын көрсетті.

Оқу жаттығуға «ҚТЖ» ҰҚ» АҚ – «Ақтөбе магистральдық желі бөлімшесі» филиалының бас инженері Темірбек Елғонды, «ҚТЖ-Жүк тасымалы» Батыс филиалының бас инженері Жасұлан Рысқалиев және азаматтық қорғаныс қызметкерлері қатысты. Шынайы оқиғаға мейлінше жақын өткен жаттығу барысында Ақтөбе өрт сөндіру пойызы мен облыстық ТЖД қызметкерлері жоғары дайындықтары мен сауатты іс-қимылдарын паш етті.  

Сценарий бойынша Бестамақ станциясында күкірт қышқылын тасушы цистерна жолдан шығып кетеді. Нәтижесінде оқиға орнында техногендік сипаттағы төтенше жағдай тіркелді. Қауіптің алдын алу, салдарын жою міндеттелген Ақтөбе өрт сөндіру пойызы берілген міндетті тиісінше орындауға кірісті. Күкірт қышқылы тиелген цистернаның дәнекерленген жеріне зақым келіп, 0,008 м шамасында тесік пайда болғаны анықталды. Өрт сөндіру пойызының қызметкерлері цистернаға арнайы қысқыш салып, ағып жатқан күкірт қышқылын тоқтата алды. Жерге аққан күкірт кышқылының жанжағы құммен қоршалып, үсті көбікпен жабылды.  

Ақтөбе өрт сөндіру пойызының бастығы Бауыржан Файзулланың жетекшілігімен өткен шараға жеке құрамнан 17 адам қатысты. Апат болган жерде күкірт қышқылынан уланған адамды носилкамен алып шығып, далалық емханаға жеткізіліп, алғашқы медициналық көмек көрсетілді. Апат болған жер толықтай залалсыздандырылып, Ақтөбе өрт сөндіру пойызы берілген тапсырманы уақытында және сауатты орындады деген баға берілді.  

«Жаттығуда ең алдымен жеке құрамның іс-қимылы жедел және шапшаң болып, сауатты әрекет ете білуі маңызды. Апаттық жағдайда және өрттің алдын алу бағытындағы жұмыстарды нығайтуға бағытталған жұмыстар тұрақты жүреді. Оқу-жаттығудағы қиындықтар, оларды еңсеру өте қажет, нағыз апаттық жағдайда көмегі болады», – деді Темірбек Елғонды.