Темір жолда келеңсіз жайттар жиілеп кеткен
«Қазақстан теміржолшысы» газетінің тілшісі
Қазақстан темір жолының қызметкерлері тұрақты түрде халық арасында ақпараттық-түсіндіру шараларын өткізіп келеді. «Темір жол – қауіпті аймақ!» тақырыбындағы дәрістер, түсіндіру және бейне көрсетілімдер оқу орындары мен мектептерде жиі ұйымдастырылады.
2025 жылдың қаңтар-ақпан айларында станциялар мен мектептерде теміржол жолдарын қауіпсіз кесіп өту ережелері бойынша 257 жиналыс өткізілді. Оларға 14 мыңнан астам адам қатысты.
Сонымен қатар ай сайын желілік ішкі істер департаменті қызметкерлерімен темір жолды рұқсатсыз кесіп өтетін жерлерде бірлескен рейдтер өткізіліп тұрады. Жыл басынан бері 78 рейд жүргізіліп, оның барысында 6 әкімшілік айыппұл салынды.
Оқиғаларға жасалған талдау адамдардың пойыз астына түсіп қалуы көп жағдайда жапа шегушілердің жеке абайсыздығымен байланысты екенін көрсетіп отыр. Негізгі себептер – темір жолды белгіленбеген жерлерден кесіп өту, абайсыздық және алкогольдік ішімдік ішу жағдайлары.
Мамандар соңғы уақытта жасөспірімдердің жүк және жолаушылар вагондарының баспалдақтарына мінуге әрекеттену жайттарының жиілеп кеткенін айтып отыр. Бұл – салдары ауыр жарақаттануға немесе қайғылы оқиғаларға әкелетін қауіпті әрекет. Сол себепті теміржолшылар болат жол бойында қауіпсіздік қағидаларын қатаң сақтауға шақырады.