Құрылғылар жұмысы қадағалануда

Қызылорда белгі беру және байланыс дистанциясы пойыздардың қозғалыс қауіпсіздігін қамтамасыз ете отырып, жыл басынан бері апатты немесе оқыс оқиғаларға жол бермеген.

Бұл – теміржолшылардың кәсіби біліктілігінің, жауапкершілігінің және өз міндеттерін атқарудағы жоғары деңгейінің көрсеткіші болып табылады. Дистанциялықтардың алдына қойған басты мақсаты – теміржол көлігінің үздіксіз және қауіпсіз жұмысын қамтамасыз ету, сонымен қатар еңбек адамдарының амандығын сақтау.  

Осы ретте дистанция басшысы Әбдірахман Сырлыбаевтың теміржолшылардың еңбегін жоғары бағалап, олардың атқарып жатқан жұмыстарының маңыздылығына ерекше назар аударатынын айтып өткен жөн. Оның пікірінше, ШЧ Қызылорда теміржолшылары өз міндеттерін абыроймен атқарып, теміржол көлігінің қауіпсіздігі мен үздіксіз жұмысын қамтамасыз ету үшін үлкен үлес қосып келеді.  

– Қызылорда белгі беру және байланыс дистанциясының қызметкерлері теміржол қозғалысының қауіпсіздігін қамтамасыз етуде аса маңызды рөл атқарады. Біз өз міндеттерімізді орындауда тек техникалық құралдарды жаңарту немесе ауыстырумен ғана шектелмейміз, ең бастысы адамдардың қауіпсіздігі мен амандығын бірінші орынға қоямыз. Біз тұрақты түрде жаңа технологиялар мен заманауи жабдықтарды енгізу арқылы теміржол жүйесінің қауіпсіздігі мен тиімділігін арттыруға күш саламыз, – дейді дистанция бастығы.  

Дистанциялықтар тарапынан өткен айда бірнеше маңызды техникалық, жоспарлы, ағымдық күтім, құрылғылардың бабын жасау жұмыстары атқарылған. Мәселен, олар Сұлутөбе станциясында орын алған Н2 шығыс сигналының бұғатталуынан УКПС және ҚМУ құрылғыларының іске қосылуына байланысты тексеру жасап, орын алған олқылықты толық зерттеп, жауапты тұлғалар кемшілікті техталапқа сай болуы үшін шұғыл әрекет етіп, жөнге келтірген.  

Қызылорда белгі беру және байланыс дистанциясының теміржолшылары техникалық ұйымдастыру шараларын жүзеге асыруда да жоғары белсенділік танытып отыр. Олар Шорнақ станциясында №5 ажыратқыштың СП-6 электр жетегін ауыстырса, Шиелі станциясында (ЧД, М4, Н6, Н10 және ЧМ10 сигналдары) бағдаршамдарының тетіктері алмастырылған. Боройнақ теміржол учаскесінде №6 ажыратқыштың СП-6 электр жетегі жаңартылған. Жаңақорған станциясында СП-6 электр жетегінің №4 ажыратқышын алмастыру жүргізілген. Сонымен қатар Боройнақ бекетінде №10 ажыратқыштағы СП-6 электр жетегі, сондай-ақ Шиеліде СП-6 электр жетегінің №94 ажыратқышы 15СС электр жетегіне ауыстырылған. Қаракеткенде СП-6 электр жетегінің No15СС ажыратқышына ауыстыру жұмыстары да табысты аяқталған. Бұл жұмыстар теміржол инфрақұрылымының жоғары деңгейде жұмыс істеуін қамтамасыз ету мақсатында жүргізілген маңызды қадамдар болды.  

Маневрлік бағдаршамдар қауіпсіздік шараларының басты нүктесі саналады. Шиеліде маневрлік бағдаршамның басын М42 бағдаршамға орнату және ауыстыру жұмыстары аяқталды. Бұл – жұмыс теміржол көлігінің қозғалыс қауіпсіздігін арттыруға бағытталған маңызды шара. Дистанциялықтардың әрбір күні, атқарып жатқан әрбір жұмысы теміржол үшін үлкен маңызға ие. Бұл тек олардың кәсіби деңгейі мен шеберлігін көрсетіп қана қоймай, бүкіл ұжымның осы салаға деген адалдығын, жауапкершілігін және өз міндеттеріне деген құрметін дәлелдейді.