Жануарлар жүздеген шұғыл тежеуге себепкер болуда
2025 жылдың басынан бері Көліктегі полиция департаментінде пойыздардың шұғыл тежелуіне қатысты 554 факті тіркелген, деп хабарлайды Rail-news.kz.
Оның 401-і теміржол бойында жануарлардың болуына байланысты болған. Атап айтқанда, 142 жылқыны, 69 ірі қара малды, 30 ұсақ малды және т.б. қағып кету жағдайлары орын алған.
Мұндай оқиғалар қозғалыс қауіпсіздігіне елеулі қауіп төндіріп, апатты жағдайларды күшейтеді әрі адамдар мен жануарлардың өміріне қатер төндіреді. Мәселен, өткен тәулікте Павлодар облысында электровоз жылқыны, ал Маңғыстау облысында жүк пойызы ірі қара малды қағып кеткен. Сонымен қатар, Алматы және Түркістан облыстарында темір жол төсемінің бойында жайылып жүрген ірі қара және ұсақ малға соқтығысудың алдын алуға мүмкіндік туды.
Жоғарыда аталған барлық жағдайларда көлік полицейлері жануарлардың иелерін жедел анықтап, оларды теміржолдың бөлінген жолағында мал жаю қағидаларын бұзғаны үшін әкімшілік жауапкершілікке тартты.