Белгіленбеген жерден өту — теміржолдағы басты қауіп
2025 жылдың басынан бері Көліктегі полиция департаментінде пойыздардың шұғыл тежелуінің 972 фактісі тіркелді. Оның 211-і жол бойында адамдардың болуына байланысты, ал 725-і үй жануарларының кесірінен орын алған, деп хабарлайды Rail-news.kz.
Көліктегі полиция департаментінің мәліметінше, темір жолды белгіленбеген жерден кесіп өткен 29 350 азамат әкімшілік жауапкершілікке тартылған.
Жазатайым оқиғалардың алдын алу мақсатында көлік полицейлері теміржол қызметкерлерімен бірлесіп тұрақты түрде алдын алу шараларын жүргізуде. Алайда, жүргізіліп жатқан іс-шараларға қарамастан, азаматтардың теміржол көлігі жарақатын алуы жалғасуда.
Осы уақыт ішінде жылжымалы құрамның астына 41 адам түсіп, олардың тең жартысы көз жұмды. Зардап шеккендер арасында кәмелетке толмағандар мен кішкентай балалардың болуы қынжылтады.
«Қайғылы жағдайлардың негізгі себебі әлі де азаматтардың қауіпсіздік ережелерін бұзуы мен темір жолдарды белгіленбеген жерлерден кесіп өтуі болып табылады. Сонымен қатар, теміржол нысандарында алкогольдік мас күйінде жүріп жазымға ұшырағандар да бар. Бұл жағдайлар адам өліміне, пойыз қозғалысының кестесінің бұзылуына, тіпті апаттық жағдайлардың туындауына әкеледі», -деп мәлімдеді департамент.
Мәселен, тек соңғы тәулікте Қостанай және Жетісу облыстарында екі оқиға тіркелді. Екі жағдайда да азаматтар темір жолдарды белгіленбеген жерлерден кесіп өткен. Машинистердің шұғыл әрекет етуінің арқасында пойыз тоқтап, қайғылы жағдайлардың алдын алу мүмкін болды. Құқық бұзушылар әкімшілік жауапкершілікке тартылған.