Таразда болашақ теміржолшыларға қауіпсіздік сабақтары өтті

Темір жолдағы қауіпсіздік ере¬желері мен талаптарды әсіресе болашақ мамандар білуі тиіс.

Тараз теміржол көлік және коммуникация колледжінде теміржол нысандарында тиісті қоғамдық тәртіпті сақтау, қауіп-қатердің алдын алу жолдарын түсіндіру мақсатында жауапты органдардың мамандарымен кездесу ұйымдас- тырылды. Тараз станциясындағы Желілік полиция бөлімі әкімшілік полиция бөлімшесінің инспекторы, полиция аға лейтенанты Әлімжан Жаңабаев, полиция аға лейтенанты Мақсат Шырынханов желі бойында «Қауіпсіз жол» жəне «Учаске» атты жедел профилактикалық айлық жүргізіліп жатқанын айта келіп, «Темір жол – аса қауіпті аймақ» тақырыбында түсіндірме жұмыстарын жүргізді.

Болашақ мамандарды практикалық сабақтар кезінде барынша қауіпсіздік талаптарын сақтауға шақырды.  

– Бүгінгі студенттер – ертеңгі станция кезекшісі, вагон қараушы, машинистің көмекшісі, тағысын тағы. Сондықтан бүгіннен бастап есте сақтайтын ережелерге қанық болып, біліп жүрсін деген мақсатпен желілік полиция өкілдерін шақырдық, – дейді Жеңіс Тайбеков.  

Кездесуде болашақ мамандарға темір жолдағы қауіпсіздік ережелері, пойыздарды шұғыл тежеу жағдайларының себептері түсіндірілді. Жасөспірімдер қылмыстары¬ның алдын алу үшін кәмелетке толмағандар арасында әкімшілік құқық бұзушылықтарды және олардың түнгі мезгілде заңды тұлғаларының ілесіп жүруінсіз үйінен тыс жерлерде болуын анықтап, профилактикалық іс-шаралар жүргізудің маңызы туралы айтылды.