Теміржолшылар жасанды интеллект көмегіне жүгінді

Қандыағаштық теміржолшылар жол бойына мал жаймау қажеттігін жасанды интеллект көмегімен халыққа түсіндіре бастады. Олар бұл әрекеттің тек экономикалық шығын ғана емес, адам өміріне тікелей қауіп төндіретінін қарапайым тілмен жеткізуді мақсат еткен.

Қандыағаш жол дистанциясы Жем – Қандыағаш, Сағыз, Никельтау учаскелерін қоса алғанда жалпы ұзындығы 497,6 шақырым телімді қамтиды. Соңғы уақытта осы аралықта төрт түлік малдың теміржол бойына шығу деректері жиілеп кеткен.  

Дистанция мәліметінше, 2025 жылдың басынан бері малдың теміржолға шығуына байланысты 76 оқиға тіркелген. Мұндай жағдайлар жолаушы және жүк пойыздарының қозғалыс қауіпсіздігіне, жолаушылардың өміріне қауіп төндіріп қана қоймай, қауіпті жүк тасымалы кезінде вагондардың рельстен шығып кету қаупін арттырады. Бұл өз кезегінде қоршаған ортаға зиян келтіруі мүмкін.  

Қандыағаш жол дистанциясының қызметкерлері жол бойына мал шығып кету оқиғаларын азайту мақсатында профилак тикалық жұмыстарды күшейтті. Теміржолға жақын орналасқан елді мекендерде тұрғындармен және мал иелерімен жеке кездесулер өткізіліп, мал жаю ережелері түсіндірілуде. Қадағалаусыз малдың жолға шығуына жол бермеу жөнінде ескертулер берілді.  

Мамандардың айтуынша, теміржол бойында бөгде заттардың жатуы, белгіленбеген жерден адамдардың өтуі және малдың жолға шығуы – қозғалыс қауіпсіздігіне тікелей әсер ететін негізгі факторлар. Дистанция қызметкерлері жайылымға жіберілген малдың темір жолға шығып кетуінен туындайтын шұғыл тежеулердің алдын алу үшін тұрақты түрде күрес жүргізіп келеді.  

Еңбек қорғау инженерлері мал иелеріне теміржолға жақын жерде мал жаю талаптарын үнемі түсіндіруде. ҚР Әкімшілік құқық бұзушылық туралы кодекстің 559-бабына сәйкес, малды рельстен кемінде 300 метр қашықтықта байлап жаюға, ал тұрақты бақылаумен 2000 метр қашықтықта бағуға рұқсат етіледі.  

Теміржол көлігіндегі қозғалыс қауіпсіздігін қамтамасыз ету ережелерін бұзу әкімшілік жауапкершілікке әкеп соғады. Атап айтқанда, көлік арбамен теміржолдан өту ережесін бұзу, мал айдап өту немесе теміржол аумағында мал жаю фактілері үшін ескерту беріледі немесе азаматтарға 5 АЕК-ке дейін, ал лауазымды тұлғаларға 10 АЕК-ке дейін айыппұл салынады.