«Назар аудар, жолда адам!»: ШЧ-36 мамандары қауіпсіздік шараларын пысықтады

Жамбыл белгі беру және байланыс дистанциясы Тараз станциясындағы техникалық кітапханамен бірлесіп «Теміржол көлігіндегі қауіпсіздік: мәселелер, шешу жолдары» тақырыбында оқу семинарын өткізді.

2 ақпаннан бері барлық өңірде жүріп жатқан «Назар аудар, жолда адам!» атты айлық аясында өткен семинарда ШЧ-36 Жамбыл белгі беру және байланыс дистанциясының бас инженері Аман Ұлақұлов магистральдық желі учаскелерінде орын алған келеңсіз оқиғалардың себептері мен салдарына тоқталып, жол бойында қатаң сақталуы тиіс еңбек қауіпсіздігі ережелері мен талаптарын түсіндірді.  

– Теміржолшы ең бірінші кезекте еңбек қауіпсіздігін сақтай отырып, пойыздар қозғалысына жауапты екенін ұмытпауы тиіс. Әр маман, жұмысшы өз ісін тиянақты атқаруы арқылы қауіп-қатердің алдын алуға үлкен үлес қосады. Өзіне жүктелген міндетті орындауда алдымен қауіпсіз еңбек талаптарын сақтауы шарт, – деген Аман Ұлықпанұлы жұмыс барысында кездесетін бірқатар қателіктерді талдап айтып берді.  

Тараз станциясындағы техникалық кітапхананың бас кітапханашысы Жәнібек Рысбеков дистанция қызметкерлеріне шойын жол бойындағы қозғалыс кезінде естен шығаруға болмайтын ескертулер жазылған арнайы әдістемелік нұсқаулықтар таратып, қауіп-қатердің алдын алу бағытында ұсынылатын техникалық-ғылыми еңбектерді таныстырып өтті. Дистанцияның еңбекті қорғау жөніндегі жетекші инженері Ержан Ахметбеков пен эколог-инженер Айгүл Керімбекова еңбекті қорғау және экологиялық қауіпсіздік мәселелеріне тоқталды.  

– Теміржол бойында түрлі қатердің алдын алу, қозғалыс қауіпсіздігін қамтамасыз ету қашанда өзекті. Бұл мәселеде біз теміржолшыларды қозғалыс қауіпсіздігіне қатысты әдістемелік, теориялық нұсқаулықтармен қамтамасыз етуге тырысамыз. Кітапханаға жыл сайын 12 түрлі ғылыми-техникалық журналдар мен газеттерді жазғызып алып отырамыз. Оның ішінде локомотив, вагон, жолшы, тағы сол сияқты салалық құрылымдарға арналған басылымдар бар. Одан бөлек кітапхана қорында да кітаптар жеткілікті. «Назар аудар, жолда адам!» айлығы басталғалы бері Жамбыл филиалындағы техникалық кітапхананың Шу және Сарышаған бөлімшелері жергілікті станция және дистанцияларда осындай бірлескен іс-шаралар өткізді, – дейді бас кітапханашы Жәнібек Есмұратұлы.  

Осы ретте Жамбыл белгі беру және байланыс дистанциясындағы еңбекті қорғау жөніндегі техникалық кабинетінің материалдық-техникалық базасы мамандар үшін теория және тәжірибе жүзінде әдістемелік көмек көрсету үшін өте ыңғайлы, талапқа сай жабдықталғанын айта кету керек. Нұсқаулар мен ереже, талаптардың бәрі тақырыптық стендтерден орын тапқан.