Жамбылдық теміржолшылар қауіпсіздік шараларын пысықтады
"Қазақстан теміржолшысы" газетінің Жамбыл облысындағы меншікті тілшісі
«ҚТЖ – Жүк тасымалы» ЖШС Жамбыл филиалы және Жамбыл магистральдық желі бөлімшесі қызметкерлерінің төтенше жағдайлар кезіндегі іс-қимылдарға дайындық деңгейін арттыру мақсатында әкімшілік ғимаратта сейсмикалық оқу-жаттығу өткізілді.
Филиалдардың бас инженерлері Дүйсенбек Сыдықов пен Дастан Садықов жаттығу барысында мекеме қызметкерлерін ғимараттан қауіпсіз жерге шығару іс-қимылдарына жетекшілік етті.
– Жамбыл жері сейсмикалық қауіпті аймақтар қатарында. Өткен апта соңында оңтүстік өңірлер – Қызылорда, Түркістан және біздің облыста қуаты 2 балдық жер сілкінісі тіркелді. Жыл ішінде қуаты әртүрлі зілзала бірнеше рет қайталануы мүмкін. Сондықтан, төтенше жағдай кезінде қызметкерлердің практикалық дағдыларын пысықтау, сондай-ақ хабарлау жүйелерінің дайындығын және бөлімшелер арасындағы өзара іс-қимылды тексерудің маңызы бар. Жаттығу кезінде қызметкерлерді уақытылы хабардар ету, ғимараттар мен құрылыстардан эвакуациялауды ұйымдастыру, сондай-ақ зардап шеккендерге алғашқы көмек көрсету бойынша іс-шараларды пысықтадық, – дейді «ҚТЖ – Жүк тасымалы» ЖШС Жамбыл филиалының бас инженері Дүйсенбек Сыдықов.
Оқу-жаттығуға қос филиалдың директорлары Айдын Сеитбенбетов пен Мейрамбек Кенжебаев қатысып, қызметкерлердің төтенше жағдайлар кезіндегі дайындық деңгейін тексерді. Эвакуациялық жоспар бойынша мамандарды қауіпсіз жерге көшіру барысын бақылап, тиісті нұсқаулар берді.
Жамбыл жол бөлімшесінде мұндай оқу-жаттығулар жоспарға сай өткізіліп тұратындықтан, жаттығудың барлық қатысушылары бекітілген нұсқауларға сәйкес әрекет етті және дайындықтың қанағаттанарлық деңгейін көрсетті. Ықтимал төтенше жағдайлар кезінде жедел әрекет етіп, тіпті қажет жағдайда бастапқы медициналық жәрдем берді.
Жаттығу барысында жалпы іс-қимылға қатысты ескертулер мен ұсыныстар да айтылды. Ескертілген кемшіліктер қауіпсіздік жүйесін одан әрі жетілдіру үшін ескерілетін болды.