Еңбекті қорғау күні атап өтілді

ҚТЖ-да 28 сәуір – Дүниежүзілік еңбекті қорғау күні атап өтілді. Қауіпсіздік минуты рәсімімен басталған жиынға компанияның Өндірістік қауіпсіздік және экология департаментінің директоры Әділбай Семенов және «Қазтеміржолкәсіп» ҚБ төрағасының орынбасары Ғафу Несіпбаев қатысты. Іс-шара барысында бұл күннің маңызы түсіндіріліп, сала үздіктері марапатталды.

Биылғы жылы атаулы күнге «Қолайлы психо-әлеуметтік жұмыс ортасы: жұмысшылар мен мықты ұйымның дамуына бастар жол» деген тақырып арқау етілді. Демек жұмыс барысында күйзелісті төмендетуге, кәсіби тұрғыда жұмыстан шаршаудың алдын алуға, салауатты психологиялық орта мен ахуал қалыптастыруға басымдық беріледі. Қатысушылар бұл күннің тарихы өндірісте жүріп қаза тапқан жұмысшыларды еске алумен басталғанын атап өтті.

Алғаш рет бұл күн 1989 жылы Солтүстік Америка кәсіподақ ұйымының бастамасымен атап өтіле бастады. Сол арқылы әлем назарын өндірістік жарақаттанушылық, жұмыс берушілердің жауапкершілігін арттыруға, қауіпсіз еңбекті қамтамасыз етуге аудару көзделген.  

– Бүгінде бұл күннің маңызы одан сайын артып, кеңейе түсті. Еңбек қорғау – тек нормалар мен ережелерді сақтау ғана емес, қауіптің алдын алу, қауіпсіздік мәдениетін қалыптастыру, заманауи технологияларды енгізу, цифрландыру және ЖИ мүмкіндіктерін қолдану тұрғысынан да аясы ұлғая түсті. Дегенмен өзгерістерге қарамастан, ең бастысы – адам мен оның өмірі және денсаулығы ең үлкен назарда болып қала береді. Қызметі өндірістік қауіпсіздікпен тікелей байланысты біздің компания үшін де еңбек қорғау мәселелері сөзсіз басымдыққа ие сала болып саналады. Қауіпсіздік – бұл күн сайынғы тәжірибе, ол әр адамның жеке жауапкершілігінен бастау алады, – деді департамент директоры.  

Халықаралық еңбек ұйымының деректері бойынша жыл сайын әлемде 2,7 млн-нан астам жұмысшы өндірісте жүріп қаза табады. Сондықтан қатысушылар жұмыста жүріп жарақат алуды мүлдем болдырмау – мақсат қана емес, ол ойлау нормасы екенін атап өтті. Жиында одан әрі «ҚТЖ» ҰК» АҚ Басқарма төрағасының Алғыс хатымен еліміздің бірнеше өңірінен келген 9 теміржолшы марапатталды. Солардың бірі Маңғыстау магистральдық желі бөлімшесі еңбек қорғау және экология қызметінің бастығы Амангелді Мақсымбердиев еңбегінің еленіп, марапат алғанына алғыс білдірді.

– Алты жылдан бері түбек теміржолындағы еңбек қауіпсіздігін сақтау қызметінде еңбек етіп келемін. Бүгін берілген әрбір марапат – кәсібилікті, жауапкершілікті, қауіпсіздікті сақтаудың жоғары мәдениетін мойындау. Қауіпсіздік – бірлескен күштің, күн сайын тәртіп сақтаудың нәтижесі. Сондықтан бұл салада әрбіріміздің жауапты қызметіміз маңызды. Өз жұмыс орнында қауіпсіз еңбек жағдайын қамтамасыз етуге бар еңбегін арнап жүрген әріптестерімді құттықтаймын, – деді ол.