Заң мен тәртіп: Болашақ жүргізушілерге теміржол өткеліндегі қауіпсіздік ережелері түсіндірілді
«Қазақстан теміржолшысы» газетінің тілшісі
«Қауіпсіз өткел» акциясы аясында қостанайлық теміржолшылар жыл сайын бір мыңнан астам жүргізуші даярлайтын «Вираж Авто-2012» автомектебінде кездесу өткізді.
Теміржол өткелдеріндегі қауіпсіздік мәселесіне арналған профилактикалық дәріс «Заң мен тәртіп» тұжырымдамасы мен жол-көлік оқиғаларының алдын алу бағытында ұйымдастырылды. Дәрісті Қостанай магистральдық желі бөлімшесінің директоры Марат Тугамбаев өткізді. Ол тыңдаушыларға теміржол өткелдерінен қауіпсіз өту қағидаларын түсіндіріп, қауіпсіздік талаптарын бұзғаны үшін жауапкершілік туралы еске салды, сондай-ақ Жол қозғалысы қағидаларын сақтамаудың салдарынан орын алған нақты оқиғаларды мысалға келтірді. Кездесу соңында қатысушыларға ақпараттық жадынамалар таратылып, қойылған сұрақтарға жауап берілді.
Қостанай магистральдық желі бөлімшесінде мұндай профилактикалық жұмыстар тұрақты түрде жүргізіліп келеді. Биылғы жылдың басынан бері желілік полициямен бірлесіп 105 профилактикалық рейд ұйымдастырылып, 2 370 жүргізушіге түсіндіру жұмыстары жүргізілді. Бұдан бөлек, автокөлік кәсіпорындарында қауіпсіздік мәселелеріне арналған он кездесу өткізілді.