Қауіпсіздікке талап қашан да жоғары

Шымкент магистральдық желі бөлімшесінде жыл сайын теміржол өткелдерінде жол-көлік оқиғаларының алдын алу, пойыздар мен автокөлік құралдарының қозғалыс қауіпсіздігін арттыру, сондай-ақ жүргізушілердің теміржол өткелдерінен өту қағидаларын бұзуына жол бермеу мақсатында тұрақты негізде кешенді профилактикалық іс-шаралар өткізіліп келеді.  

Биылғы «Қауіпсіз өткел» және «Қауіпсіз темір жол» сынды профилактикалық іс-шаралар «Заң мен тәртіп» тұжырымдамасын негізге ала отырып жүргізілді. Бөлімше мамандары осы жылы аталған тұжырымдама аясында 12 рейд өткізіліп, олардың барысында теміржол өткелдерінен өту қағидаларын бұзудың 54 фактісі анықталғанын алға тартты.  

– Оңтүстік – халық көп шоғырланған өңір. Темір жол бойымен қозғалатын адам да, көлік те көп. Сондықтан оқыс оқиғалардың алдын алу бағытында біз жергілікті атқарушы органдармен және желілік полиция бөлімшелері өкілдерімен тұрақты жұмыс жүргізіп келеміз. Биыл да профилактикалық жұмыстар аясында қауіпсіздік талаптары мен теміржол өткелдерінен өту қағидалары түсіндіріліп, нәтижесінде 536 жүргізуші қауіпсіздік талаптарымен таныстырылды. Рейдтер барысында бағдаршамның тыйым салатын белгісін елемеу, жабық шлагбаумды айналып өту, өткел аумағында автокөлік құралдарын тоқтату және тұраққа қою, сондай-ақ теміржол өткеліне жақындаған кезде қауіпсіздік талаптарын сақтамау сынды құқық бұзушылықтарға жол бермеуге ерекше назар аударылды, – дейді бөлімше директорының орынбасары Жомарт Мырзабеков.

Теміржолшылар теміржол өткелдеріндегі қауіпсіздік мәселелері бойынша бұқаралық ақпарат құралдары арқылы ақпараттық-түсіндіру жұмыстарын да жүргізіп, теледидарда сөз сөйлеп, газетке мақалалар жариялап тұрады. Сонымен қатар мүдделі ұйымдар мен кәсіпорындардың атына профилактикалық жұмысты күшейту және теміржол өткелдеріндегі қауіпсіздік талаптарының бұзылуына жол бермеу мақсатында отызға жуық ақпараттық хат жолданған. Қозғалыс қауіпсіздігін қамтамасыз ету мақсатында тиісті жұмыстар атқарылып, теміржол өткелдеріндегі көріну деңгейі жақсартылған. Сондай-ақ темір жолдарды кесіп өту кезінде қауіпсіздік қағидаларын сақтауға шақыратын ақпараттық ескертулер орналастырылған.  

Атап өтерлігі, профилактикалық жұмыстар жол дистанцияларының, теміржол өткелдеріне қызмет көрсететін мамандардың, сондай-ақ мүдделі ұйымдардың өкілдерімен өзара іс-қимыл жасай отырып жүргізілуде. Әсіресе автокөлік қозғалысы қарқынды теміржол өткелдеріне және жол қозғалысы қағидаларын бұзу қаупі жоғары учаскелерге ерекше назар аударылуда. Қауіпсіздікке талап қашан да жоғары.