Оқушыларға теміржолдағы қауіпсіздік ережелері ескертілді
Қызылорда облысы бойынша меншікті тілші
Әскерилендірілген теміржол күзетінің Шиелі станциясындағы жасағы теміржол нысандарындағы тәртіп пен қауіпсіздікті қамтамасыз ету бағытында профилактикалық іс-шара өткізді.
Оқушылардың мектепке баратын қыркүйек айындағы жедел-профилактикалық іс-шара теміржол көлігі нысандарында тәртіп пен қауіпсіздікті қамтамасыз етуге бағытталып, Шиелі атқыштар топ күзетшісі Батырхан Ильясов пен Шиелі станциясы желілік полициясының кіші сержанты Бексұлтан Жұмаділдаев бастаған топ алдын ала белгіленген нысандарда әрі-бері өткен үлкен-кішіге қауіпті аймақтың қауіп-қатерін түсіндірді.
Сонымен қатар №270 Ғ.Мұхамеджанов атындағы орта мектептің 1-11 сынып оқушыларымен кездесу өтті. Кездесу барысында оқушыларға темір жолдағы қауіпсіздік ережелері жан-жақты түсіндірілді. Әсіресе темір жолды белгіленбеген жерден кесіп өтпеу, темір жол маңында ойнамау, пойыздардың терезелеріне тас лақтырып сындырмау, темір жолға бөгде заттар қоймау және темір жол бойында абай болу қажеттігі ескертілді.
Сонымен қатар жасөспірімдерге құқық бұзушылық жасаған жағдайда туындайтын әкімшілік және қылмыстық жауапкершілік ескертілді. Пойыз қозғалысына қауіп төндіретін кез келген әрекеттің адам өмірі мен денсаулығына зор қауіп келтіретіні айтылды.
– Темір жол – жоғары жауапкершілікті талап ететін қауіпті аймақ. Сондықтан қауіпсіздік талаптарын сақтау, құқық бұзушылықтардың алдын алу және жергілікті тұрғындарға, оның шінде жасөспірімдерге дұрыс бағытбағдар беру бағытындағы профилактикалық жұмыстар қашан да өзекті, – дейді Әскерилендірілген теміржол күзеті Шиелі атқыштар тобының бастығы Жандос Тарманов.
