Балалар қауіпсіздігі – бәрінен қымбат
Қызылорда облысы бойынша меншікті тілші
Жаңа оқу жылының басталуымен қауіпсіздік айы жарияланып, жол бойына жақын оқу орындарында балалар қауіпсіздігіне арналған кең көлемде профилактикалық жұмыстар жүргізілуде.
«ӘТЖК» ЖШС Түркістан филиалының Қызылорда аймағында орналасқан Сексеуіл, Қазалы, Қызылорда, Шиелі атқыштар командасының қызметкерлері жергілікті мектептерді аралап, теміржолдың қауіп-қатерін түсіндіріп, сақтандыруда.
Қызылорда атқыштар командасының сарбаздары мен станция басшылары желілік полиция өкілдерімен бірлесіп Акмаржан мөлтек ауданындағы №282 мектепте және Белкөл кентіндегі №189 мектепте «Теміржол-қауіпті аймақ» тақырыбында профилактикалық іс-шаралар өткізді.
Темір жолдың қауіпті аймақ екені бесенеден белгілі болса да оған жақындағанда «үйдің тұсынан өте салайын», «жақындау жолмен, төтелеп өтіп кетем» деген ой кейде қауіпке бастайтынын біліп, көріп жүрсе де теміржол маңында сақтықты ұмытып жататындар тиылар емес. Белгіленбеген жерден теміржолды кесіп өтушілер, жылжымалы құрамға тас атып залалға ұшырататындар арасында балалар да өкінішке орай аз емес.
– Баланың қауіпсіздігі – бәрінен қымбат. Оқу жылының басталуына орай теміржол обьектілерінде балалардың қауіпсіздігін қамтамасыз ету және теміржолдағы жазатайым оқиғалардың алдын алу шаралары күшейтілуде. Қауіпсіздік айлығына байланысты балалардың қауіпті аумақта қауіпсіздік талап-ережелерін қатаң сақтау, теміржолды арнайы белгіленген жерлерден ғана өту, өткелдердің тыйым салынған белгілеріне тоқтау керектігі, аса қауіпті аймақта сақ болу қажеттігі балаларға жан-жақты түсіндіріліп, ескертілуде, – дейді Қызылорда атқыштар командасының бастығы Рахманберген Жұмабеков.