Қауіпсіздік пен біліктілік бәсекесі

10 қыркүйек күні Астанада «ҚТЖ» ҰК» АҚ қауіпсіздік және еңбек қорғау және экология мамандарының арасында корпоративтік олимпиадалар өтті. Оған ел өңірлеріндегі желілік теміржол кәсіпорындарының осы салалардағы жетекші мамандары қатысты.

Олимпиадалардың ашылу салтанатында «ҚТЖ» ҰК» АҚ Өндірістік қауіпсіздік және экология департаментінің директоры Әділбай Семенов сөз алды.  

– Жыл сайынғы дәстүрмен биыл да Қауіпсіздік және еңбек қорғау (ЕҚжҚ), сондай-ақ экология саласы қызметкерлерінің басын біріктірген олимпиада өткізіп отырмыз. Бұл сайыстың мақсаты осы саладағы қызметті жетілдіру және мамандардың мәртебесін арттыру. Сонымен қатар мамандардың шығармашылық белсенділігін, кәсіби шеберлігін және дағдыларын жетілдіру, атқаратын жұмыстарын жетілдіруге ынталандырып, озық формалар мен жұмыс тәсілдерін кеңінен тарату. Сондықтан бүгінгі әрқайсысыңызға жетістік пен сәттілік тілей отырып, олимпиадалар әріптестер арасындағы тәжірибе бөлісу, білім-біліктілікті жетілдіру алаңы болатынына сенімдімін, – деді Әділбай Тайғараұлы.  

Корпоративтік олимпиадаға қатысу үшін үміткерлер штаттағы маман болуы, еңбек өтілі екі жылдан кем болмауы, сонымен қатар желілік және аймақтық деңгейлердегі сайыстардан озып шығулары тиіс болатын. Міне, осы критерийлерден сүрінбей өткен мамандар республикалық олимпиадада бас қосты.  

Алдымен таңертең еңбек қорғау және қауіпсіздік мамандарына, ал түстен кейін экологтарға арналған олимпиада өтті. Маңызды сайыстар алдында қауіпсіздік минуты жарияланып, қазылар алқасы мен олимпиада ережелері таныстырылды. Олимпиада үш турдан тұрды. Бірінші турда қатысушылар тестік тапсырмаларды орындаса, екінші турда ситуациялық жағдайлардағы іс-қимылдары мен шешім қабылдаулары сыналды. Ал үшінші турда блиц-сауалнамаға жауап берді.  

Қауіпсіздік және еңбек қорғау мамандарына арналған білім мен білік бәсекесінде олимпиада жеңімпаздары болып Амангелді Мақсымбердиев (1 орын), Сергей Тарасов (2 орын) және Балабек Әлібек (3 орын) танылды.  

– Корпоративтік олимпиадаға алғаш қатысуым. Бірінші турдағы тестілік тапсырмада 20 сұрақ келді. Бәрі біздің күнделікті жұмысымызға қатысты болды. Сондықтан кейбір сұраққа сенімді жауап берсем, кейбіреуіне ойлануға тура келді. Екінші ситуациялық жағдайда да біліктілігіміз, еңбек қорғау инспекторы ретіндегі қызметтік іс-әрекеттеріміз сынға түсті. Ал үшінші блиц-сауалнама турының шарты бойынша, сұраққа басқа үміткерлер дұрыс жауап бере алмаса, ұпай сұрақ қоюшы адамға кететін еді. Өзім әріптестерімнің екі сұрағына дұрыс жауап бердім, – деп ой бөлісті олимпиада жеңімпазы, Маңғыстау магистральдық желі бөлімшесі еңбек қорғау және экология бөлімінің бастығы Амангелді Мақсымбердиев.