Депода жаңа көрнекілік - Ов сериялы паровоздың көшірмесі пайда болды

Павлодар локомотив пайдалану депосы машинисінің көмекшісі Жанат Сейітов «Овечка» атауымен белгілі «ОВ» сериялы бірінші паровоздың көшірмесін жасап шықты, деп хабарлайды Rail-news.kz.  

Модель 1:3 масштабында жасалған. Паровоз фотосуреттер мен ескі схемалардан қалпына келтірілді. Сызбалар 1976 жылғы «Техника молодежи» журналынан алынғае. Энтузиаст бір жыл бойы ақпарат жинап, теміржол техникасын қалпына келтірудің қыр-сырын білетін ресейлік шеберлермен кеңескен. Модельді құрастыру үш айға созылыпты. Машинист  көмекшісі өз туындысын жұмыстан бос уақытта жасап отырған. Бөлшектердің бәрі қолмен жасалды. Кейін модельді тепловоз машинисі Михаил Дубгорный бояп шықты.

Паровоз аймаққа жүз жыл бұрын келген түпнұсқадан айнымайтын көшірмесі болып шықты. Павлодар станциясына ол бірінші жүкті жеткізіп, осы учаскеде теміржол қозғалысын ашқан болатын. 

Паровозды қалпына келтіру идеясының бастамашысы – депо бастығы Алмас Төлеубаев екенін атап өткен жөн. Жоба өңір теміржолшыларының игі еңбегіне, «ҚТЖ» ҰК» АҚ-ның құрылғанына 25 жыл толуына және салалық кәсіподақтың 30 жылдығына арналып отыр.

Жұмысшылардың керемет сыйы Әскери даңқ мұражайына қарама-қарсы депо аумағындағы тұғырға орнатылды. Деподағылар атап өткендей, «овечка» көптеген сынақтарға: бірінші дүниежүзілік соғыстың ауыр жылдарына, революцияға, Азаматтық және Ұлы Отан соғысытарына тап болды. Деподағы паровоз моделі ағартушылық жұмыста қолданылып, оны оқушылар мен студенттерге арналған экскурсия барысында көрсететін болады.