Былтыр Атырау темір жолында бірде-бір өндірістік жарақат болған жоқ
Атырау облысы бойынша меншікті тілші
Статистикалық мәліметтер көрсеткендей, қауіпсіздікті сақтамаудан күн сайын адамдар зардап шегеді. Қаншама адамның денсаулығы мен өміріне қауіп төнеді, өндіріс шығынға ұшырайды. Сондықтан да аса қауіпті аймақ саналатын темір жолда қауіпсіздік – ең басты талап.
Өткен жылы «ҚТЖ-Жүк тасымалы» ЖШС «Батыс» филиалына қарасты Атырау қосалқы бөлімінде өндірістік жарақат алу жағдайы болмаған. Ол, әрине, жақсы көрсеткіш. Оған қауіпсіздік пен еңбек қорғауды қамтамасыз ету мақсатында жүргізілген тексерулер, станцияларда жұмысшылармен технологиялық процесті, қауіпсіздік техникасының ережелерін сақтауды қадағалау, т.т. шаралар себеп болғаны анық.
Мысалы, 2021 жылы барлығы 171 кенеттен тексеру жүргізілсе, оның 89-ы түнгі уақытта болған. Бұл жерде, әрине, тексеру арқылы кемшілік табу мақсаты тұрмағандығы түсінікті. Алдымен, қауіпсіздіктің сақталуы, жұмысшының жауапкершілігін арттыру міндеті тұр. Бөлімшенің еңбек қорғау инженері Гауһар Бержанованың айтуынша, тексеру барысында 114 кемшілік анықталған. Олар негізінен қауіпсіздік техникасын, жұмыс технологиясын, лауазымдық міндеттерді сақтамау, арнаулы киім мен белгі беру құралдарын қолданбау, еңбек тәртібін бұзу, білім төмендігі, медициналық тексерістен уақытылы өтпеу сынды кемшіліктер.
Қауіпсіздікті сақтауда практикалық сабақтардың тиімділігі жоғары болатыны сөзсіз. Бұл бағытта қауіптілігі аса жоғары аймақта жасайтын жұмысшыларға қауіпсіз жұмыс істеу іс-тәжірибесін көрсету бойынша 124 сабақ өтіпті. Қауіпсіздік диалогы бойынша да 84 қауіпті жағдайдан мысал келтірілген. Кестеге сәйкес, отыздан аса станция мен мекемелерде техникалық ревизия жүргізіліп, 540 жұмысшының білім деңгейі тексерілген. Теміржолшылардың үнемі дала өтінде жүретіні белгілі. Сол бағытта еңбек гигиенасы, суықта қалай жүру, ыстықта өзін қалай ұстау, қатты жел кезінде қалай әрекет ету мысалдары пысықталған. Ол бойынша бюллетендер таратылған.
Теміржолшылар тәуліктің кез келген уақытында жұмыста болуы мүмкін мамандық иелері. Оларда арнайы тамақтану уақыты болғанымен, пойыз келіп тұрғанда оған мүмкіндік бола бермейді. Соған сәйкес, олардың еңбек жағдайын жақсарту мақсатында Ганюшкино, Атырау, Ақжайык, Теңдік, Қарабатан, Сағыз, Құлсары, ВЧДЭ-1 Атырау бекеттерінде ас ішу бөлмелері жабдықталып, қажетті жағдай жасалыпты.
Еңбек қорғау саласына қатысты экология мен өрт қауіпсіздігін сақтау мәселесіне келсек, өткен жылы табиғат қорғауға қатысты 11 шара жоспарланып, оған 7904,12 теңге бөлінген, оның ішінде қоршаған ортаға шығарындыларды өлшеу, лампаларды утилизациялау (120 дана), ластанған топырақты және қатты тұрмыстық қалдықтарды көму, локомотив деполарында топыраққа лабораториялық зерттеу жүргізу, темір қалдықтарына радиациялық бақылау жасау, т.б. шаралар бар. Өрт бойынша 2 түтіндеу оқиғасы тіркелген, бірақ уақытында шара қолданылып, материалдық шығын болмаған.
Теміржолдағы алғашқы еңбек қысын өткізуші 23 адамның барлығы да оқытылып, тәжірибелі мамандарға бекітіліп беріліпті. Станцияларда «Қауіпсіздік диалогы», «Өндірістік қауіпсіздіктің он екі негізгі ережесі», «Хенрих травматизмінің пирамидасы» тақырыптарында көрнекі жадынамалар ілінген. Сол секілді медициналық мекемемен «Инфаркт пен инсульттің алдын алу» жадынамасы әзірленіп, «Бірінші медициналық көмек көрсету» бойынша жедел жәрдем мамандарымен тренинг өткізілген. Жалпы қауіпсіздік бойынша өткен жылы 10 шара жоспарланып, оған бөлінген 50171,78 мың теңге толықтай игеріліпті. Ал жазғы-қысқы арнаулы киіммен және арнайы қорғаныс құралдарымен бөлімше жұмысшылары 100 пайыз қамтамасыз етілген, ол жағынан шағым жоқ.