Теміржолдың төл тарихын жасағандар
Абай облысы бойынша меншікті тілші
Жуырда Семей теміржолында салалық қызметте ұзақ жылдар бойы еселі еңбек еткен ардагерлердің басын қосқан алқалы жиын болып өтті. Бөлімшедегі ардагерлер ұйымы ұйытқы болған, кәсіподақ қолдау көрсеткен «Атам-әжем – асыл қазынам!» атты шараға желі бойындағы барлық зейнет жасындағы қариялар жиналды.
Жиынның беташар рәсімінде бөлімше басшылығы, «Қазтеміржолкәсіп» ҚБ Семей өңірі бойынша өкілі Есен Қажығұлов сөз алып, ардагерлерді өткен Халықаралық қарттар күнімен құттықтады. Олардың көпжылдық адал еңбектері үшін алғыс айтты. Сонымен қатар салалық кәсіподақ ардагерлеріне «Кәсіподақ қозғалысының дамуына қосқан үлесі үшін» төсбелгісін салтанатты түрде табыстады.
Өз кезегінде ардагерлер кеңесінің төрағасы, Құрметті теміржолшы Қырықбай Әлсейітұлы теміржолдағы барша еңбеккерлердің мүдделеріне қатысты мәселелерді шешуде кәсіподақ қызметін жоғары бағалады. Ал «Бағыт» теміржолшы әйелдер ұйымының төрайымы, ардагерлер ұйымының белсендісі Нағима Мойынбаева өз сөзінде алдағы уақытта ардагерлер қауымы ұлттық салт-дәстүр мен өнерді насихаттауға ерекше ден қойып отырғанын жеткізді.
Құттықтау лебіздерден кейін ардагерлердің өнерпаз ұл-қыздарына кезек беріліп, ән мен жырдан шашу шашылды. Мерекелік көңіл күйдегі басқосу барысында ардагерлер қауымына арналып ретро әндер көптеп шырқалды. Олар Халықаралық қарттар күніне арналған іс-шарадан ерекше әсермен қайтты.
